ប្រព័ន្ធផ្សព្វផ្សាយ Al-Ahram ប្រទេសអេហ្ស៊ីប បានរាយការណ៍កាលពីថ្ងៃអាទិត្យឲ្យដឹងថា អាជ្ញាធរអាកាសចរណ៍ បានបញ្ជាឲ្យអាកាសយានដ្ឋានអន្តរជាតិទីក្រុង Cairo បំពាក់ឧបករណ៍កាំរស្មី X ដើម្បីរកមើលគ្រាប់បែក និងដាក់ដំណើរការនៅ២ខែខាងមុខ។ នេះបើយោងតាមគេហទំព័រសារព័ត៌មាន sputnik បានចេញផ្សាយនាព្រឹកថ្ងៃច័ន្ទ ទី០៧ ខែសីហា ឆ្នាំ២០១៧។
នៅចុងខែមុន គណៈប្រតិភូជំនាញការរុស្ស៊ីស្ដីពីសន្តិសុខអាកាសចរណ៍ បានបញ្ចប់ការត្រួតពិនិត្យផ្នែកសន្តិសុខនៃប្រលានយន្តហោះទីក្រុង Cairo ដែលនឹងត្រូវប្រើសម្រាប់ដឹកអ្នកដំណើររបស់ក្រុមហ៊ុន Aeroflot របស់ទីក្រុងម៉ូស្គូ បន្ទាប់ពីជើងហោះហើរបន្ត។
ពួកគេក៏បានពិនិត្យមើលវិធានការនានា ដែលត្រូវធ្វើដោយអេហ្ស៊ីប ដើម្បីធានាសុវត្ថិភាពអ្នកដំណើរ បុគ្គលិកអាកាសយានិក រួមទាំងប្រព័ន្ធឃ្លាំមើលវីដេអូ និងឧបករណ៍អេឡិចត្រូនិក ដែលបានដំឡើងជាថ្មីៗនេះ សម្រាប់ធ្វើការស្កេនបុគ្គលិកចូលក្នុងប្រលានយន្តហោះផងដែរ។
គួរបញ្ជាក់ផងដែរថា នៅខែវិច្ឆិកា ឆ្នាំ២០១៥ ក្រុងម៉ូស្គូ បានផ្អាកការហោះហើររវាងរុស្ស៊ី និងអេហ្ស៊ីប បន្ទាប់ពីយន្តហោះដឹកអ្នកដំណើររុស្ស៊ី បានបុកគ្នានៅក្នុងតំបន់ស៊ីណៃ (Sinai) ដែលសម្លាប់មនុស្សប្រមាណ ២២៤នាក់នៅក្នុងហេតុការណ៍នេះ។ បន្ទាប់ពីការធ្លាក់យន្តហោះនេះ រុស្ស៊ីបានស្នើឲ្យអេហ្ស៊ីប គួរតែបង្កើនវិធានការណ៍សន្តិសុខ និងចុះហត្ថលេខាលើសាររួមគ្នាមួយស្ដីពីសន្តិសុខអាកាសចរណ៍ប្រទេសទាំងពីរ៕
