អតីតខ្សែបម្រើ Liverpool លោក Jamie Redknapp បាននិយាយថាក្រុមបិសាចក្រហម Manchester United នឹងឈ្នះពាន Premier League ប្រសិនបើពួកគេអាចចុះកុងត្រាស៊ីញេយក Bale ពី Real Madrid បានក្នុងរដូវក្ដៅនេះ។
បិសាចក្រហមមានព័ត៌មានជាប់ទាក់ទងក្នុងការចុះកុងត្រាខ្សែប្រយុទ្ធជម្រើសជាតិវែលហើយ Redknapp ជឿថាបើទិញបានមែននោះ Man Utd ពិតជាធ្វើឲ្យកក្រើក Premier League មិនខាន។ និយាយក្នុងគេហទំព័រកីឡាករលំដាប់ពិភពលោក Sky Sport News ទាក់ទងទៅនឹងរដូវកាលថ្មីអតីតកីឡាករ Liverpool និយាយយ៉ាងដូច្នេះ៖
" ប្រសិនបើអាចទៅរួច(ទិញ Bale)អ្នកគិតថាគួរតែប្រគល់ពានឲ្យ Man Utd ពេលនេះតែម្ដងទៅ។ ខ្ញុំមិនចង់និយាយអី ពីនរណាផ្សេងទៀតទេ ដោយសារតែ Bale ល្អស្រាប់ទៅហើយ។គាត់នឹងធ្វើឲ្យ Premier League កក្រើកម្ដងទៀតពេលគាត់ត្រឡប់មកវិញ"។
“ ខ្ញុំគិតថាវិធីសាស្ត្រដែលគាត់លេង ក្នុងក្រុមគឺពិតជា គួរឲ្យចាប់អារម្មណ៍។ មានតែកីឡាករពីរបីនាក់ប៉ុណ្ណោះ ដែលអាចធ្វើនូវអ្វីដែលគាត់អាច។ គាត់កើតមកលើកលោកនេះ ដើម្បី Premier League នេះគឺជាភាពពិត។ ពេលខ្លះលីកណាមួយក៏សាកសមសម្រាប់គាត់ដែរ។ ប្រសិនបើគាត់ទំនេរ មិនមែនមានតែMan Utd ទេដែលចង់បានគាត់ ក្រុមដទៃទៀតអាចនឹងប្រជែងជាមួយ Man Utd ដើម្បីចុះកុងត្រា។"
ចុងក្រោយអតីតកីឡាករ លេងឲ្យ Liverpool បាន២៣៧ប្រកួតនិយាយថា៖“ ពេលដែលអ្នកមានកីឡាករដូចជា Bale គឺជាគុណសម្បត្តិរបស់អ្នក។ អ្នកអាចមានជម្រើស ប្រសិនបើគាត់ចាកចេញខ្ញុំជឿថា Jose នឹងព្យាយាមទិញគាត់ហើយបើគាត់មកមែនគឺចាំតែមើលទៅ!”៕
