ស៊ីឌី បទចម្រៀង "ជីវិតអ្នកក្រ" របស់ ខេម បានដុតអារម្មណ៍អ្នកគាំទ្រមួយរយៈមកហើយ។ ទើបតែនៅពេលនេះផលិតកម្ម ថោន បានចេញជា MV ដែលមានសាច់រឿងកម្សត់សោកសង្រេងស្ទើរតែទប់ទឹកភ្នែកមិនជាប់ តែអ្វីដែលធ្វើឲ្យទស្សនិកជនកាន់តែឆួលក្នុងចិត្តនោះ គឺ ខេម បានប្រាប់ថា សាច់រឿងក្នុងMV ខាងលើ ជារឿងពិតរបស់លោកជាង៥០ភាគរយ។
លោក ខេម បានប្រាប់ថា បទចម្រៀង "ជីវិតអ្នកក្រ" គឺលោកបានស្នើឲ្យអ្នកនិពន្ធសរសេរឡើង ក្នុងគោលបំណងចង់បង្ហាញពីជីវិតអ្នកក្រ រស់នៅក្នុងទុក្ខលំបាកកម្រិតណា ហើយយើងកើតមកជាកូនអ្នកក្រគ្រប់រូប គួរមានចិត្តតស៊ូកម្រិតណា ដើម្បីកែប្រែជីវិតឲ្យចាក់ផុតពីក្ដីលំបាក ដែលធ្លាប់បានឆ្លងកាត់។
ខេម បន្តថា រឿងទុក្ខវេទនាទាំងនេះ លោកក៏ចង់បង្ហាញឲ្យអ្នកដែលកើតមកជាកូនអ្នកមានបានឃើញពីរូបភាពពិតរបស់អ្នកក្រផងដែរ ព្រោះកូនអ្នកមានខ្លះ គាត់មិនធ្លាប់បានឃើញ មិនទាន់បានជួប ឬបានឈ្វេងយល់ពីការលំបាករបស់អ្នកក្របានច្រើននោះទេ ដូច្នេះហើយទើបលោកចង់រំលេចនូវខ្សែជីវិតអ្នកក្រឲ្យសង្គមមនុស្សទាំងអស់បានទស្សនា។
តារាចម្រៀងកំពូលរបស់ផលិតកម្ម ថោន រូបនេះបញ្ជាក់ថា សាច់រឿងក្នុង MV ខាងលើគឺជារឿងពិតរបស់លោកជាង ៥០ភាគរយ គឺលោកកើតមកជាកូនអ្នកក្រ ធ្លាប់ជួបការពិបាកច្រើន រហូតបានសម្រេចចិត្តចាកចេញពីស្រុកកំណើតមកទីក្រុង ធ្វើការគ្រប់បែបយ៉ាង ដើម្បីរកប្រាក់ចិញ្ចឹមក្រពះ និងផ្ញើជូនម្ដាយនៅឯកស្រុក ហើយតម្លៃនៃការព្យាយាមរបស់លោក ទីបំផុត ក៏ជួយឲ្យចាកផុតពីភាពអត់ឃ្លានផងដែរ៕
