ទីក្រុងប៉េកាំង គ្រោងនឹងធ្វើសមយុទ្ធទ្រង់ទ្រាយធំជាលើកទី២ រយៈពេលបីថ្ងៃ នៅជិតឆ្នេរប្រទេសកូរ៉េខាងជើង ខាងមុខនេះ។ បើយោងតាមគេហទំព័រសារព័ត៌មាន រុស្ស៊ី (RT) បានចុះផ្សាយនាយប់ថ្ងៃសុក្រ ទី០៤ ខែសីហា ឆ្នាំ២០១៧។
សេចក្ដីប្រកាសនេះ បានបង្ហាញឲ្យដឹងថា សមយុទ្ធនេះនឹងធ្វើចាប់ពីម៉ោង ៦ព្រឹកថ្ងៃសៅរ៍ ដល់ម៉ោង ៦ល្ងាចនៅថ្ងៃអង្គារ ខែសីហា សប្ដាហ៍ក្រោយ ហើយវាពាក់ព័ន្ធនឹងប្រតិបត្តិការយោធាទ្រង់ទ្រាយធំ ដែលបញ្ជាក់ថា ប្រទេសចិនត្រៀមខ្លួនរួចជាស្រេចក្នុងការការពារពីសកម្មភាពនុយក្លេអ៊ែរ ពីប្រទេសជិតខាង។ ចិនបានបញ្ជាទិញនាវាចំនួន ១៨គ្រឿងកាលពីឆ្នាំមុន ខណៈពេលបច្ចុប្បន្ននេះវាដំណើរការតែនាវាផ្ទុកយន្តហោះមួយដែលផលិតដោយសូវៀតប៉ុណ្ណោះ ការសាកល្បងនាវាទីពីរ កំពុងបន្តសាងសង់ទាំងស្រុងនៅកន្លែងផលិតនាវាក្នុងស្រុកមួយកន្លែង។
យោងតាមក្រុមអ្នកវិភាគក្នុងតំបន់ បានឲ្យដឹងថា ពេលវេលា និងជម្រើសនៃទីតាំងសម្រាប់សមយុទ្ធនាពេលបច្ចុប្បន្ន គឺទាក់ទងនឹងការបញ្ជាក់ឡើងវិញនូវថាមពលរបស់ចិនជាងតម្រូវការបន្ទាន់ ដើម្បីសាកល្បងនាវាថ្មី។
គួរបញ្ជាក់ផងដែរថា សមយុទ្ធកងទ័ពជើងទឹកចិននឹងប្រព្រឹត្តទៅនៅពេលដែលរដ្ឋមន្ត្រីការបរទេសអាមេរិកលោក Rex Tillerson រដ្ឋមន្ត្រីការបរទេសចិនលោក Wang Yi និងរដ្ឋមន្ត្រីការបរទេស រុស្ស៊ីលោក Sergey Lavrov ជួបគ្នានៅទីក្រុងម៉ានីល ក្នុងអំឡុងវេទិកាអ្នកការទូតជាន់ខ្ពស់អាស៊ាន និយាយអំពី បញ្ហានៃការដាក់ទណ្ឌកម្មប្រឆាំងនឹងកូរ៉េខាងជើង ភាពតានតឹងពាណិជ្ជកម្មរវាងទីក្រុងវ៉ាស៊ីនតោន និងទីក្រុងប៉េកាំង និងការដាក់ប្រព័ន្ធការពារមីស៊ីល THAAD របស់អាមេរិកនៅកូរ៉េខាងត្បូង៕
