Pisey
កាលពីថ្ងៃម្សិលមិញនេះតារាចម្រៀងកំពុងល្បី ពេជ្រ សោភា បានចេញសារលើកទឹកចិត្តអ្នកគាំទ្រដែលត្រូវប្រលងទាំង ឌីប្លូម និងបាក់ឌុប ធ្វើឲ្យFan របស់នាងជាច្រើនសម្ដែងការអរគុណ។ ដោយឡែកថ្ងៃនេះ តារាចម្រៀងល្បីឈ្មោះ សាន់ដេ កញ្ញា យូរី បានបង្ហើបថា ក្រៅពីពាក្យជូនពរអ្នកគាំទ្រឲ្យប្រលងជាប់គ្រប់គ្នា នាងក៏បានត្រៀម កាដូ ជូនក្រុមរាំម្នាក់ ដែលត្រូវប្រលង បាក់ឌុប ឆ្នាំនេះផងដែរ។
ការបង្ហើបនេះលោក តាន់ ចន្ថា ក៏បានសុំឲ្យ យូរី បញ្ជាក់ប្រាប់ កាដូ ដែលត្រៀមជាអ្វី និងមានតម្លៃប៉ុន្មានផងដែរ ប៉ុន្តែតារាស្រីរូបនេះប្រាប់ថា នាងសុំមិនទាន់ប្រាប់ជារបស់អ្វីទេ ហើយក៏មិនទាន់ឲ្យឃើញដែរ ព្រោះនាងចង់ធ្វើឲ្យអ្នករាំក្នុងក្រុមម្នាក់ ដែលត្រូវប្រលងឆ្នាំនេះ មានការភ្ញាក់ផ្អើលខ្លាំងពេលគាត់ប្រលងចប់។
យូរី បន្តថា កាដូ នេះ ទោះជាអ្នករាំរបស់នាងប្រលងជាប់ ឬធ្លាក់ក៏ដោយ នាងនៅតែជូន ដើម្បីលើកទឹកចិត្តគាត់ ក្នុងនាមនាងជាតារាចម្រៀងម្នាក់ចង់សម្ដែងទឹកចិត្ត និងយកចិត្តទុកដាក់ចំពោះគាត់ ដែលជាដៃគូការងារសិល្បៈធ្លាប់ឆ្លងកាត់ការនឿយហត់ច្រើន ដើម្បីបម្រើអារម្មណ៍បងប្អូន ហើយក្រៅពីក្រុមរាំ នាងក៏សូមជូនពរដល់ Fan ទាំងអស់ ដែលត្រូវប្រលងឆ្នាំនេះជាប់ទាំងអស់គ្នាផងដែរ៕
