កូរ៉េខាងត្បូង យល់ព្រមឲ្យសហរដ្ឋអាមេរិក ដាក់ពង្រាយប្រព័ន្ធការពារមីស៊ីល (THAAD) នៅក្នុងប្រទេស។ នេះបើយោងគេហទំព័រសារព័ត៌មាន sputnik បានចុះផ្សាយនាព្រឹកថ្ងៃអង្គារ ទី២៩ ខែសីហា ឆ្នាំ២០១៧។
ទីភ្នាក់ងារព័ត៌មាន យ៉ុនហាប បានរាយការណ៍នាពេលថ្មីៗថា កិច្ចព្រមព្រៀងនេះ ត្រូវបានសម្រេច ក្នុងកំឡុងពេលសន្ទនាតាមទូរស័ព្ទរវាងប្រធានអគ្គសេនាធិការចម្រុះអាមេរិកលោក Joseph Dunford និងឧត្ដមសេនីយ៍កូរ៉េខាងត្បូងលោក Jeong Kyeong-doo។ ទីភ្នាក់ងារ បានបន្ថែមទៀតថា យោធាកូរ៉េខាងត្បូង និងអាមេរិក បានព្រមព្រៀងគ្នា ចាត់វិធានការសងសឹកចំពោះការបាញ់បង្ហោះកាំជ្រួចផ្លោង ចុងក្រោយរបស់កូរ៉េខាងជើង និងត្រៀមខ្លួនជាស្រេច ដើម្បីឆ្លើយតបសកម្មភាពយោធាផ្សេងៗផងដែរ។
ប្រធានាធិបតីកូរ៉េខាងត្បូងលោក Moon Jae-in បាននិយាយឲ្យដឹងថា សហរដ្ឋអាមេរិក កំពុងពិចារណាពីការដាក់ពង្រាយឧបករណ៍ការពារយុទ្ធសាស្ត្ររបស់ខ្លួនទៅឲ្យទីក្រុង សេអ៊ូល បន្ទាប់ពីការបាញ់មីស៊ីលផ្លោងចុងក្រោយរបស់កូរ៉េខាងជើង កាលពីម្សិលមិញ។
គួរបញ្ជាក់ផងដែរថា គណៈលេខាធិការរដ្ឋមន្ត្រីជប៉ុនលោក Yoshihide Suga បានប្រាប់ឲ្យដឹងថា មីស៊ីលដែលបានហោះឆ្លងកាត់កោះហុកកៃដូ ភាគខាងជើងប្រទេស ហើយបានធ្លាក់ចូលមហាសមុទ្រប៉ាស៊ីហ្វិក ក្នុងចម្ងាយ ១.១៨០គីឡូម៉ែត្រ៕
