នៅព្រឹកនេះប្រវត្តិស្ត្រីឈ្មោះ រួន រ៉ុម ដែលបានលួចខោអាវនៅ ផ្សារ១៣មករា ខេត្ត បាត់ដំបងកាលពីព្រឹកថ្ងៃទី ៣១ ខែ កក្កដា ឆ្នាំ ២០១៧ បានធ្លាយចេញកាន់តែច្បាស់ហើយ គាត់អាយុ ៦៣ ឆ្នាំ មានស្រុកកំណើតនៅភូមិ ដកត្រង ឃុំពង្រ ស្រុកពញាឭ ខេត្តកណ្ដាល ទីលំនៅ និងមុខរបរសព្វថ្ងៃមិនពិតប្រាកដ និងធ្លាប់ធ្វើសកម្មភាពលួចជាច្រើនលើក និងទើបចេញពីគុកនៅខេត្តបន្ទាយមានជ័យ។
ក្រោយដឹងពីប្រវត្តិស្ត្រីឈ្មោះ រួន រ៉ុម លោក សុគន្ធ ថេរ៉ាយុ ដែលជាតារាចម្រៀងចិត្តទន់ពោរពេញដោយក្ដីអាណិត ក៏បានចំណាយថវិកាផ្ទាល់ខ្លួន និងរៃអង្គាសពីមិត្តភ័ក្ដិបានចំនួនប្រមាណ៣០០ដុល្លារជូនទៅអុំស្រី ដើម្បីដោះស្រាយភាពទីទាល់ ឬបង្កើតមុខរបរចិញ្ចឹមក្រពះ។
តារារូបនេះបន្តថា ក្ដីអាណិតសម្រាប់ចាស់ជរា ក្មេងកំព្រា គឺដក់ជាប់ក្នុងបេះដូងលោក ដូច្នេះហើយទើបលោកតែងធ្វើសកម្មភាពមនុស្សធម៌។ ជាក់ស្ដែងដូចជាអុំស្រីគឺលោកបានជួយតាមលទ្ធភាព ដើម្បីជូនគាត់ដោះស្រាយបញ្ហាចំពោះមុខ ប៉ុន្តែការដែលលោកធ្វើបែបនេះមិនមែនកាន់ជើងចោរនោះទេ គឺកើតចេញពីក្ដីអាណិតគាត់មានវ័យចាស់ និងមានជីវភាពទីទាល់ខ្លាំង។
លោកបន្តថា រឿងគាត់ពីមុនលោកមិនបានដឹងទេ តែលោកស្គាល់គាត់ក្នុងពេលនេះ ដូច្នេះហើយ បើសិនជាប្រវត្តិគាត់ពិតជាធ្លាប់ប្រព្រឹត្តិអំពើលួចគេច្រើនលើកមែន គឺគាត់គួរតែកែប្រែ ព្រោះបងប្អូនខ្មែរយើងស្រឡាញ់អាណិកគាត់ច្រើន តែមិនគាំទ្រឲ្យគាត់ទៅលួចគេទេ ហើយក្រោយកើតរឿងពេលនេះលោកជឿថា បងប្អូនជួយឧបត្ថម្ភគាត់បានច្រើន ដែលអាចជួយឲ្យគាត់បង្កើតមុខរបរតូចមួយអាចចិញ្ចឹមជីវិតបាន៕
