កូរ៉េខាងជើង បានបង្ហាញរូបភាពកាំជ្រួចមីស៊ីលឆ្លងទ្វីបកម្រិតមធ្យម (IBM) ដែលបានបាញ់ទៅលើប្រទេសជប៉ុន ដែលបង្កឲ្យមានការភ័យខ្លាច នឹងកើតឡើងសង្គ្រាមលោកលើកទី៣។ នេះបើយោងតាមគេហទំព័រសារព័ត៌មាន Express បានចុះផ្សាយនាព្រឹកថ្ងៃពុធ ទី៣០ ខែសីហា ឆ្នាំ២០១៧។
មីស៊ីលនេះ ត្រូវបានបាញ់បង្ហោះចេញពីទីក្រុង Sunan ជិតទីក្រុងព្យុងយ៉ាងរបស់ប្រទេសកូរ៉េខាងជើង និងអាចហោះចម្ងាយប្រហែល ២.៧០០ គីឡូម៉ែត្រ។ បញ្ជាការដ្ឋានអាមេរិកប្រចាំតំបន់ប៉ាស៊ីហ្វិករបស់ទីស្នាក់ការកណ្ដាលកោះហាវ៉ៃ បានប្រាប់ឲ្យដឹងថា កូរ៉េខាងជើង បាញ់មីស៊ីលចំនួន៣គ្រាប់ ដោយគ្រាប់ទីមួយ និងទីបី នៅវេលាម៉ោង ១១៖៤៩នាទីព្រឹក និងគ្រាប់ទីពីរ ម៉ោង ១០៖៤៩នាទីរសៀល (ម៉ោងក្នុងស្រុក) បានទទួលបរាជ័យក្នុងបាញ់បង្ហោះ។
ប្រធានាធិបតីកូរ៉េខាងត្បូងលោក Moon Jae-in បានបញ្ជាឲ្យកងកម្លាំងធ្វើការឆ្លើយតបទៅនឹងការបាញ់បង្ហោះនេះ ដោយប្រើយន្តហោះចំនួន ៤គ្រឿងទម្លាក់គ្រាប់បែកធុនធ្ងន់ ដែលអាចបំពាក់ក្បាលគ្រាប់នុយក្លេអ៊ែរ ពេលធ្វើសមយុទ្ធជាមួយអាមេរិក កាលពីម្សិលមិញ។
គួរបញ្ជាក់ផងដែរថា អ្នកស្រាវជ្រាវជាន់ខ្ពស់កម្មវិធី Chatham House Asia បាននិយាយថា លោក គីម ជុងអ៊ុន គ្រោងរៀបចំបាញ់បង្ហោះមីស៊ីលធន់ធ្ងន់នៅពាក់កណ្ដាលខែសីហា ប៉ុន្តែអ្នកឯកទេសម្នាក់ បានព្រមានថា ទីក្រុងព្យុងយ៉ាង គួរតែបញ្ឈប់ការវាយប្រហារទឹកដីអាម៉េរិក និងប្រឆាំងនឹងលោក ដូណាល់ ត្រាំ៕
