រាជធានីភ្នំពេញ៖ នៅក្នុងជំនួបពិភាក្សាជាមួយបងប្អូនជនជាតិសួយ នាទីស្តីការក្រសួងបរិស្ថាន កាលពីព្រឹកមិញនេះ លោករដ្ឋមន្ត្រី សាយ សំអាល់ បានសន្យាជួយជនជាតិដើមមួយនេះប្រែក្លាយសហគមន៍តំបន់ការពារធម្មជាតិកោរដូនតី ទេទឹកពុះ ដែលស្ថិតក្នុងស្រុកឱរ៉ាល់នោះ ទៅតំបន់ទេសចរណ៍ធម្មជាតិ។
ការប្រែក្លាយនេះ គឺលោករដ្ឋមន្ត្រី នឹងជំរុញដល់ក្រុមហ៊ុនដែលចង់វិនិយោគតំបន់ធម្មជាតិនេះ ឲ្យកសាងសង់ស្តូបតំណាងជនជាតិសួយ ដែលជាម្ចាស់ស្រុក ទីកន្លែងគោរពសក្ការៈ និងទីផ្សារបន្លែធម្មជាតិសម្រាប់ភ្ញៀវទេសចរ ដែលមកលេងកម្សាន្ត ដែលអាចជួយឱ្យប្រជាពលរដ្ឋរស់នៅសហគមន៍នេះ រកចំណូលសម្រាប់អភិវឌ្ឍន៍គ្រួសាររបស់ពួកគេ។
ឆ្លើយតបនឹងការសន្យានេះលោកស្រី វ៉ែន សាមីន តំណាងសហគមន៍ បានសម្ដែងនូវការត្រេកអរនិងអំណរគុណដល់លោករដ្ឋមន្ត្រី ដែលជួយកំណត់ព្រំដីសហគមន៍ជូនសហគមន៍ជនជាតិសួយ ជាពិសេសជួយប្រែក្លាយសហគមន៍របស់ខ្លួន ជាតំបន់ទេសចរណ៍ធម្មជាតិ និងមានទីផ្សារបន្លែជាដើមដែលផ្ដល់ឱកាសដល់ពួកគេរកចំណូលបន្ថែម៕ រូបភាព៖ ក្រសួងបរិស្ថាន
