សាច់រឿងក្នុងសង្គមតែងកើតឡើងប្លែកៗពីគ្នា ពោលគឺជីវិតស្នេហា មិនថាប្ដីប្រពន្ធ ឬគូសង្សារទេ តែងជួបបញ្ហាមិនចេះចប់ ជាពិសេសរឿងរ៉ាវអ្នកដែលមានប្រពន្ធ និងគូស្នេហ៍រូបស្រស់សោភា តែខ្លួនមានជីវភាពក្រលំបាក តែងជួបរឿងព្រាត់គ្នាជារឿយៗ ។ យ៉ាងណាមិញដូចជាសាច់រឿងក្នុង TaeserMV បទចម្រៀង "ប្ដីសន្តិសុខ" របស់លោក មាស សាលី ព្រោះតែប្ដីមិនមានប្រាក់ខែខ្ពស់ បំប៉នភាពឡូយឆាយឲ្យប្រពន្ធ នាងក៏ដាច់ចិត្តចុះចោលប្ដី និងកូន ទៅតាមបុរសមានទ្រព្យ។
បទចម្រៀង "ប្ដីសន្តិសុខ" របស់លោក មាសសាលី បានចេញស៊ីឌីមួយរយៈមកហើយ ។ បទចម្រៀងមនោសញ្ចេតនា មួយនេះបានដុតអារម្មណ៍យុវជនក្រីក្រជាច្រើន ដែលមានគូស្នេហ៍ ឬប្រពន្ធស្រស់សោភា ឲ្យគេដេកព្រួយ ព្រោះតែខ្លួនគ្មានទ្រព្យ ខ្លាចប្រពន្ធ ឬគូស្នេហ៍ផ្លាស់ចិត្តដូចក្នុងអត្ថន័យបទចម្រៀងខាងលើ។
ពេលនេះខណៈដែលបទចម្រៀងដ៏កម្សត់ចេញជា Taeser MV បង្ហាញពីសាច់រឿងពិត ធ្វើឲ្យអ្នកគាំទ្រកាន់តែរំជួលចិត្តទៅនឹងសាច់រឿង រហូតមានអ្នកចូលទស្សនាចំនួន 88K Views ក្នុងរយៈពេលតែ២០ម៉ោង។ លោក មាស សាលី ប្រាប់ថា Taeser បទចម្រៀង "ប្ដីសន្តិសុខ" គឺគ្រោងចេញ Full MV ក្នុងពេលឆាប់ៗនេះ ហើយលោកក៏សង្ឃឹមសាច់រឿងមួយបទថ្មីចាក់ចំបេះដូងទស្សនិកជនផងដែរ៕
