Mina Raiola ជឿថាពេលនេះគឺជាវេលាដ៏ត្រឹមត្រូវសម្រាប់ Lionel Messi សាកល្បងខ្លួនឯងដោយចាកចេញពីBarcelona ហើយ ខណៈរូបគេមានទំនាក់ទំនងជាមួយក្លឹបអង់គ្លេស Man City។
ភ្នាក់ងារកីឡាកររូបនេះបានផ្ដល់ដំបូន្មានសម្រាប់ Messi ថាចាកចេញពី Barca ដើម្បីពង្រឹងភាពអស្ចារ្យរបស់អ្នក។ កីឡាករជម្រើសជាតិអាហ្សង់ទីន បានយល់ព្រមបន្តកុងត្រាជាមួយ Barcelona ប៉ុន្តែពួកគេមិនទាន់បានចុះហត្ថលេខានៅឡើយដែលនេះធ្វើឲ្យអនាគតរបស់គេមានភាពស្រពិចស្រពិលនៅកីឡដ្ឋាន Camp Nou។
ស្របពេលកីឡាករវ័យ៣០ឆ្នាំ មិនទាន់កាន់ប៊ិចស៊ីញេ គ្រូបង្វឹក Man City ដែលជាអតីតគ្រូបង្វឹកក្រុមអ្នកមានបុណ្យផងនោះគឺលោក Pep Guadiola បានរំពឹងថាការផ្លាស់ប្ដូរទ្រនំរបស់ Messi ពិតជាអាចទៅរួច។
Raiola មិនមែនជាអ្នកតំណាងឲ្យ Messi ទេ ប៉ុន្តែភ្នាក់ងារសញ្ជាតិអ៊ីតាលីដើមកំណើតហុល្លង់ ដែលជាអ្នកដំណាងរបស់ Paul Pogba, Romelu Lukaku, Marco Verratti, Henrikh Mkhitaryan និង Zlatan Ibrahimovic ថាដល់ពេលត្រូវផ្លាស់ប្ដូរហើយ។
“កីឡាករដូចជា Messi គួរតែព្យាយាមជាមួយនឹងបទពិសោធន៍ថ្មី ជាមួយនឹងក្លឹបផ្សេងៗហើយពង្រឹងភាពអស្ចារ្យរបស់គាត់។ Barcelona គួរតែកែលម្អលើរឿងនេះ។" Raiola និយាយក្នុងកាសែត MARCA។
Messi គឺជាកីឡាកររកគ្រាប់បាល់បញ្ចូលទីច្រើនជាងគេបំផុតរបស់ Barcelona ដោយជួយក្លឹបនៅទឹកដីកាតាឡាន់មួយនេះ ឈ្នះពាន២៩រួមបញ្ចូលទាំង La liga និង Champions League។ លើសពីនេះ Raiola ក៏បានចែកចាយគំនិតផ្ទាល់ខ្លួនអំពីការផ្ទេរទៅ PSG របស់ Neymar ក្នុងកំណត់ត្រាពិភពលោកផងដែរ។ " ទីផ្សារបែបនេះនឹងមិនកើតឡើងទៀតទេ។ ពេលនេះប្រទេសដែលចុះកុងត្រាយកកីឡាករក្នុងស្ថានភាពនេះ មិនមែនជាការប្រកួតបាល់ទាត់ទេ។ ប៉ុន្តែការផ្ទេរក្នុងតម្លៃ២២២លានអឺរ៉ូនឹងក្លាយជារឿងធម្មតាចាប់ពីពេលនេះតទៅ"៕
