រាជធានីភ្នំពេញ៖ អភិបាលរាជធានីភ្នំពេញ បានជំរុញមន្ទីរសារធារណការក្រុងរៀបចំដាក់លិខិតស្នើសុំទៅខាងក្រុមហ៊ុន លីយ៉ុងផាត់ ដើម្បីកុំឲ្យយកលុយចំពោះរថយន្តប្រភេទទេសចរណ៍ នៅពេលឆ្លងកាត់ស្ពានព្រែកព្នៅ នៅអំឡុងពេលការស្ថាបនាស្ពានឆ្លងកាត់ទន្លេសាប ពីឬស្សីកែវ-ជ្រោយចង្វារ ដើម្បីជួយសំរួលក៏ដូចជា ដើម្បីកាត់បន្ថយការចំណាយ របស់ប្រជាពលរដ្ឋជាដើម។
ការជំរុញនេះ បានធ្វើឡើងក្នុងកិច្ចប្រជុំពិភាក្សាការងាររវាងលោក ឃួង ស្រេង អភិបាលរាជធានីជាមួយក្រុមហ៊ុន OCIC នៅព្រឹកថ្ងៃទី៨ ខែកញ្ញា នេះ បន្ទាប់ពីឯកឧត្តមបានទន្លាយគម្រោងសាងសង់ ស្ពានបាឡេខាងលើ ដែលគ្រោងចំណាយលុយប្រមាណ ៣០លានដុល្លារ ជាជំនួយរបស់ជប៉ុន ខណៈស្ពានជ្រោយចង្វារចាស់ បើកការដ្ឋានជួសជុលនៅក្រោយបុណ្យភ្ជុំបិណ្ឌ។
ទន្ទឹមគ្នានេះលោកក៏បានពិភាក្សារៀបចំកែលម្អប្រព័ន្ធចរាចរណ៍ស្ពានក្បាលថ្នល់បន្ថែម និងស្ពានត្រង់ចំណុចច្រមុះជ្រូកផ្លូវ ២៧១ និងផ្លូវ៦០ម៉ែត្រផងដែរ។ ម្យ៉ាងវិញទៀត ការកែសម្រួលរង្វង់មូលចោមចៅ ទៅជាស្ពានអាកាសក៏បានពិភាក្សាលម្អិតផងដែរ៕ រូបភាព៖ រដ្ឋបាលរាជធានីភ្នំពេញ
