ព្រោះតែស្រឡាញ់អាជីពសិល្បៈយុវវ័យមួយចំនួនសុខចិត្តបោះបង់ការសិក្សា ឬការងារដែលខ្លួនធ្លាប់ធ្វើ តែក្នុងចំណោមអ្នកទាំងនោះក៏មានអ្នកជោគជ័យ និងអ្នកបរាជ័យផងដែរ។ យ៉ាងណាមិញយុវជន ផេង សុភារឿន ហៅ លិកាង ព្រោះតែក្ដីបំណងស្រឡាញ់អាជីពចម្រៀងលោកបានបោះបង់អាជីពជាគ្រូបង្រៀនភាសាចិនមកផ្សងព្រេងក្នុងវិថីសិល្បៈ តែទីបំផុតក្ដីសុបិនរបស់លោកចាប់ផ្ដើមមានពន្លឺហើយ ខណៈដែលរូបគេត្រូវបានផលិតកម្ម សាស្តា ហៅធ្វើកុងត្រារយៈពេល៥ឆ្នាំ និងមានបទចម្រៀងចេញលើទីផ្សារចំនួន៦បទ។
លោក លិកាង បានប្រាប់ពីដំណើរខ្សែជីវិតថា លោកធ្លាប់បានធ្វើជាគ្រូបង្រៀនភាសាចិនមានរយៈពេលបួនឆ្នាំមកហើយ ប៉ុន្តែថ្មីៗនេះលោកក៏បានបោះបង់អាជីពគ្រូបង្រៀនចោល ដោយបានយកពេលមកហាក់ច្រៀង ព្រោះលោកស្រឡាញ់អាជីពសិល្បៈ និងមានក្ដីបំណងចង់ក្លាយជាតារាចម្រៀងម្នាក់។ តារារូបនេះបន្តថា ក្រោយពីលោកបានព្យាយាមហាត់ច្រៀងនៅក្នុងផលិតកម្ម សាស្តា មួយរយៈក៏ទទួលបានលទ្ធផលល្អ និងបានចូលធ្វើតេស្តសំឡេង ខាងផលិតកម្មគេពេញចិត្ត ក៏បានហៅលោកចូលធ្វើកុងត្រារយៈពេល៥ឆ្នាំតែម្ដង។
តារាថ្មីរូបនេះបន្តថា មកដល់ពេលនេះលោកបានចេញបទចម្រៀងជាAusio មានចំនួន៦បទមកហើយ មានដូចជាបទ "ឱបជាប់ទ្រូងហើយនៅតែគេឆក់បាត់ ឈឺចាប់ដល់ស្លាប់ជារឿងរបស់បងគ្មានអូនបេះដូងបងស្រាប់តែឈប់លោត នៅស្រលាញ់អូនដូចថ្ងៃមុន ព្រមធ្វើជាមនុស្សខូចចិត្តកំដរក្ដីសុខរបស់អូន និងបទ ស្រលាញ់បងប៉ុន្មានថ្ងៃទៀត? "។
លោកបន្តថា បទទាំងអស់នេះក៏បានថតជាMVមួយចំនួនហើយដែរ រង់ចាំតែថ្ងៃចេញលក់ទេ។ តារារូបនេះបញ្ជាក់ថា ការបោះបង់អាជីពជាគ្រូបង្រៀនមកស្រវាអាជីពចម្រៀងជាជម្រើសរបស់លោក ដូច្នេះហើយលោកត្រូវតែខិតខំពង្រឹងការច្រៀង ដើម្បីទទួលបានការគាំទ្រពីសំណាក់ទស្សនិកជន ហើយពេលនេះអាជីពចម្រៀងលោកក៏អាចនិយាយបានថាជោគជ័យមួយកម្រិតហើយ ព្រោះមានផលិតកម្មគេហៅកុងត្រា ៕
