អាម៉ាប៉ាប៉ាញ៉ូស
មានហេតុការណ៍ឆាបឆេះរថយន្តយោធាអាមេរិក មកពីមូលដ្ឋានទ័ព Pendleton សហរដ្ឋអាមេរិក ដែលបណ្ដាលឲ្យទាហានម៉ារីនសរុបចំនួន ១៥នាក់រងរបួសយ៉ាងធ្ងន់ធ្ងរ អំឡុងពេលធ្វើសមយុទ្ធហ្វឹកហ្វឺន និងវាយតម្លៃការងារ។ នេះបើយោងតាមគេហទំព័រសារព័ត៌មាន Sputnik បានចុះផ្សាយនាព្រឹកថ្ងៃសុក្រ ទី១៥ ខែកញ្ញា ឆ្នាំ២០១៧។
យោងតាមសេចក្ដីថ្លែងការណ៍ពីកងម៉ារីន ដែលចូលរួមនៅក្នុងធ្វើសមយុទ្ធហ្វឹកហ្វឺន និងវាយតម្លៃការងារ ឲ្យដឹងថា នៅវេលាម៉ោង ០៩៖៣៣ នាទីព្រឹក (ម៉ោងក្នុងស្រុក) មានរថយន្តយោធាអាមេរិកឆាបឆេះភ្លាមៗ បណ្ដាលឲ្យសមាជិកក្រុម ១០នាក់រងរបួសស្រាល បញ្ជូនទៅមណ្ឌលសុខភាព University of California San Diego Health និង០៥នាក់ផ្សេងទៀតរបួសធ្ងន់ធ្ងរ បញ្ជូនទៅមណ្ឌលសុខភាព UC's Irvine Medical Center។
គួរបញ្ជាក់ផងដែរថា កាលពីខែកក្កដា កន្លងទៅ មានហេតុការណ៍ធ្លាក់យន្តហោះដឹកជញ្ជូន KC-130T Hercules ដែលបណ្ដាលឲ្យទាហានម៉ារីន ១៥នាក់ និងនាវិកម្នាក់ ស្លាប់នៅក្នុងរដ្ឋ Mississippi សហរដ្ឋអាមេរិក៕
