កូរ៉េខាងជើង បានបាញ់មីស៊ីលផ្លោងមួយគ្រាប់ថ្មីថែមទៀត ដែលឆ្លងកាត់ដែនអាកាសរបស់ជប៉ុន ក្បែរកោះ Hokkaido បង្កឲ្យមានការប្រកាសអាសន្នជាសាធារណៈភ្លាមៗ។ នេះបើយោងតាមគេហទំព័រសារព័ត៌មាន រុស្ស៊ី (RT) បានចុះផ្សាយនាព្រឹកថ្ងៃសុក្រ ទី១៥ ខែកញ្ញា ឆ្នាំ២០១៧។
យោងតាមកងទ័ពកូរ៉េខាងត្បូង បានឲ្យដឹងថា កាំជ្រួចមីស៊ីលនេះ មានបាញ់បានកម្ពស់ ៧៧០គីឡូម៉ែត្រ និងរយៈចម្ងាយ ៣.៧០០គីឡូម៉ែត្រ ធ្លាក់ចូលទៅក្នុងមហាសមុទ្រប៉ាស៊ីហ្វិកចម្ងាយប្រហែល ២ពាន់គីឡូម៉ែត្រ ភាគខាងកើតនៃទ័ពអាកាស Arimori ប្រទេសជប៉ុន តែមិនទាន់ស្គាល់ឈ្មោះនៅឡើយទេ។ ទូរទស្សន៍ NHK បានប្រកាសឲ្យប្រជាពលរដ្ឋនៅក្នុងកោះ Hokkaido និង Tohoku រកកន្លែងសុវត្ថិភាព ខណៈពេលដែលគ្រាប់ផ្លោង បានហោះកាត់នៅម៉ោង ៧៖០៦នាទីព្រឹក (ម៉ោងក្នុងស្រុក)។
ទន្ទឹមនឹងនេះ រដ្ឋាភិបាលជប៉ុន បានរៀបចំសម័យប្រជុំក្រុមប្រឹក្សាសន្តិសុខជាតិ ជាបន្ទាន់មួយ ដើម្បីឆ្លើយតបទៅនឹងការបាញ់បង្ហោះចុងក្រោយបំផុតរបស់ក្រុងព្យុងយ៉ាង។
គួរបញ្ជាក់ផងដែរថា កូរ៉េខាងជើង បានឆ្លើយតបនឹងកូរ៉េខាងត្បូង ដែលធ្វើសមយុទ្ធបាញ់មីស៊ីល KEPD 350 Taurus កាលពីម្សិលមិញ ដែលទុកសម្រាប់វាយប្រហារមុនគេបង្អស់លើកូរ៉េខាងជើង និងមេដឹកនាំរបស់ពួកគេផងដែរ៕
