កូរ៉េខាងត្បូង បានបាញ់មីស៊ីលប្រឆាំង (Hyunmoo-2) ចំនួនពីរគ្រាប់ ចេញពីកន្លែងមួយក្បែរព្រំដែនអន្តរកូរ៉េភ្លាមៗ បន្ទាប់ពីកូរ៉េខាងជើង បាញ់មីស៊ីលចេញស្រុក Sunan ទីក្រុងព្យុងយ៉ាង បាន៦នាទី។នេះបើយោងតាមគេហទំព័រសារព័ត៌មាន Sputnik បានចុះផ្សាយនាព្រឹកថ្ងៃសុក្រ ទី១៥ ខែកញ្ញា។
នាយសេនាធិការចម្រុះ JCS បាននិយាយថា មីស៊ីលកូរ៉េខាងត្បូង បានបាញ់ចូលក្នុងលំហផ្ទៃសមុទ្រភាគខាងកើតចម្ងាយ ២៥០គីឡូម៉ែត្រ ខណៈមីស៊ីលរបស់កូរ៉េខាងជើង បាញ់បង្ហោះរួចជាស្រេច។ យោងតាមរបាយការណ៍នេះ ក្រសួងការពារជាតិក្រុងសេអ៊ូល បានពន្យល់ថា ខ្លួនអាចឆ្លើយតបជាបន្ទាន់ ពីព្រោះវាជាការរៀបចំរបស់កូរ៉េខាងជើង សម្រាប់ការចាប់ផ្ដើមធ្វើសង្គ្រាមក្នុងតំបន់។
គួរបញ្ជាក់ផងដែរថា វេលាម៉ោង ០៦៖៥៧នាទីព្រឹក (ម៉ោងក្នុងស្រុក) កូរ៉េខាងជើង បាញ់មីស៊ីលរយៈចម្ងាយឆ្ងាយ ធ្លាក់ចូលទៅក្នុងមហាសមុទ្រប៉ាស៊ីហ្វិក នៅចម្ងាយប្រហែល ២ពាន់ គីឡូម៉ែត្រ ភាគខាងកើតកោះ ហុកកៃដូ ប្រទេសជប៉ុន៕
