អ្នកជំនាញការកូរ៉េខាងជើង បានអះអាងថា គ្មានវិធីសាស្ត្រអី ដើម្បីបញ្ឈប់គោលបំណងរបស់លោក គីម ជុងអ៊ុន ក្នុងការសម្រេចកម្មវិធីនុយក្លេអ៊ែរ និងមីស៊ីលផ្លោងអន្តរទ្វីប នោះទេ។ នេះបើយោងតាមគេហទំព័រសារព័ត៌មាន អង់គ្លេស (Express) បានចុះផ្សាយនារសៀលថ្ងៃសុក្រ ទី១៥ ខែកញ្ញា ឆ្នាំ២០១៧។
អ្នកជំនាញការកូរ៉េខាងជើងលោក Andrei Lankov បាននិយាយថា លោក គីម ជុងអ៊ុន កំពុងពន្លឿនកម្មវិធីមីស៊ីលរបស់ខ្លួន ឲ្យបានលឿនជាងអ្វី ដែលបានរំពឹងទុក។ លោក សង្ស័យថាពិភពលោក នឹងមិនអាចរារាំងមេដឹកនាំកំពូលកូរ៉េខាងជើង ពីការសម្រេចគោលបំណង ក្នុងការបង្កើតឃ្លាំងអាវុធនុយក្លេអ៊ែរ ដែលអាចឈានទៅដល់ការកម្ទេចសហរដ្ឋអាមេរិក។
គួរបញ្ជាក់ផងដែរថា រដ្ឋមន្ត្រីការពារជាតិកូរ៉េខាងត្បូងលោក Lee Myung-jae បានបង្ហាញថា ក្រុងសេអ៊ូល បានបាញ់មីស៊ីលចំនួន ២គ្រាប់ភ្លាមៗ ដើម្បីឆ្លើយតបយោធារបស់គាត់ និងបង្ហាញពីការត្រៀមខ្លួនរួចជាស្រេច ប្រសិនបើកូរ៉េខាងជើង បន្តបាញ់មីស៊ីលថែមទៀត៕
