នៅថ្ងៃបិណ្ឌទី០៧ នេះតារាជាច្រើនកំពុងខិតខំធ្វើចង្ហាន់ទៅវត្តយ៉ាងសស្រាក់សស្រាំ ប៉ុន្តែតារាម្នាក់នេះវិញ មិនត្រឹមគ្មានលទ្ធភាពធ្វើចង្ហាន់ទៅប្រគេនព្រះសង្ឃទេ គឺថែមទាំងរស់ដោយសារចង្ហាន់ព្រះសង្ឃ ខណៈដែលរូបគេកំពុងដាច់យ៉ៃដល់កម្រិត។
លោក សុខ ដែន គឺតារាសម្ដែងច្បាច់គុន និងទើបបានចាប់អាជីពជាតារាចម្រៀងមានរយៈពេលជាងមួយឆ្នាំមកហើយ តែអាជីពសិល្បៈទាំងពីររបស់លោក នៅមិនទាន់អាចរកចំណូលចិញ្ចឹមក្រពះឆ្អែតគ្រប់ពេលឡើយ ខណៈដែលការងារសម្ដែង និងចម្រៀងត្រូវដេកផ្ទះជាច្រើនខែមក។
ផ្ដល់បទសម្ភាសន៍ជាមួយលោក តាន់ ចន្ថា អ្នកផលិតព័ត៌មាន Kqube លោក សុខ ដែន បានប្រាប់ថា រដូវបុណ្យភ្ជុំដាក់បិណ្ឌដល់វេនទី០៧ នេះលោកទើបតែធ្វើចង្ហាន់ទៅវត្តបានមួយវត្តទេ គឺនៅវត្ត ទឹកថ្លា ហើយសម្រាប់ការចំណាយលុយទាំងធ្វើម្ហូប និងចូលបុណ្យគឺលោកទទួលបានពីប្អូនធម៌ម្នាក់ជាអ្នកជួយផ្ដល់ ព្រោះគេដឹងថា លោកចង់ទៅវត្តតែគ្មានលទ្ធភាព។
តារាកំពុងដាច់យ៉ៃរូបនេះទៀតបន្តថា "សព្វថ្ងៃនេះខ្ញុំមិនត្រឹមតែគ្មានលទ្ធភាពធ្វើចង្ហាន់ទៅវត្តទេ គឺថែមទាំងរស់ដោយសារ ចង្ហាន់ព្រះសង្ឃនៅវត្តថែមទៀត ព្រោះរាល់ថ្ងៃនេះខ្ញុំតែងយួរចានស្រាក់ទៅវត្តទួលទំពួង តែពេលទៅចានស្រាក់ខ្ញុំគ្មានចង្ហាន់ទេ ទាល់តែពេលមកវិញទើបមានពេញស្រាក់តែម្ដង"។ លោកបន្តថា "ខ្ញុំមានព្រះសង្ឃមួយអង្គលោកស្រឡាញ់រាប់អានច្រើនឆ្នាំមកហើយ លោកដឹងច្បាស់ថាខ្ញុំដាច់យ៉ៃ ទើបលោកឲ្យខ្ញុំទៅយកចង្ហាន់ ដែលប្រជាពលរដ្ឋធ្វើទានយកមកញ៉ាំរាល់ថ្ងៃ តែពេលចប់ពិធីបុណ្យប្រហែលជាខ្ញុំត្រូវរស់ដោយសារមីកញ្ចប់ទៀតហើយ"។
ទន្ទឹមដែលលោក សុខ ដែន មានទុក្ខនេះដែរ លោកក៏មានបទចម្រៀងថ្មីត្រៀមចេញលើហ្វេសប៊ុកទៀតដែរ តែបទថ្មីនេះលោកមិនមានលទ្ធភាពធ្វើទេ គឺបានប្អូនធម៌ដែលអ្នកនិពន្ធ និងមានស្ទូឌីយោគេបានជួយធ្វើឲ្យលោក ដោយមិនយកថវិកាឡើយ គឺគេចង់ឲ្យលោកមានបទចម្រៀងឡើងឆាក ដើម្បីទទួលបានប្រាក់ដោះទាល់ បទចម្រៀងនោះមានចំណងជើងថា "ខ្យល់បក់ដីហុយ"៕
