ភ្នំពេញៈ មួយរយៈដែលមានការផ្អើលព័ត៌មានក្នុងសង្គមសិល្បៈ ជុំវិញដំណឹងថា អ្នកនាងស្រេង សុកាន់ដា ហៅខ្ញុង តារាកំប្លែងកំពុងឡើងកូដ បានភ្ជាប់ទំនាក់ទំនងស្និតស្នាលជាមួយតារាកំប្លែងនាយកៃដ គ្រាដែលមានរូបភាពជាច្រើនបានបង្ហោះកៀកកិតគ្នាក្នុងបណ្តាញសង្គម។
ប្រភពខាងលើបានរាយការណ៍ឲ្យដឹងបន្ថែមទៀតថា ទំនាក់ទំនងស្នេហារវាងពោះម៉ាយកូន១ និងមេម៉ាយកូន១ ដែលជាតារាកំប្លែងក្នុងទ្រនំជាគ្នានេះ អ្នកទាំងពីរបានថែមទាំងបោះទុនរកស៊ីជាមួយគ្នាថែមទៀតផង ដោយបច្ចុប្បន្នកំពុងតែរកស៊ីទទួលធ្វើម្ហូបការ កាត់សក់ និងមានជួលភ្លេងខ្មែរ- សម័យរួមគ្នា។ ជាងនេះទៅទៀត ចាស់ទុំទាំងសងខាងបានដឹងឮអស់ហើយផងដែរ ត្បិតអីពេលមានរដូវបុណ្យទានម្ដង នាយ កៃដ តែងតែមានអ៊ីវ៉ាន់ជូនដល់ឪពុកម្ដាយខាងនាងខ្ញុង មិនដាច់ឡើយ ដូចកាលបុណ្យភ្ជុំបិណ្ឌកន្លងផងទៅជាដើម។
ជុំវិញការលើកឡើងនេះ នាយកៃដ វិញ មិនអាចស្នើសុំការបកស្រាយបានឡើយ ចំណែកនាងខ្ញុង វិញបានប្រកែក ដោយនាងលើកឡើងថា ទំនាក់ទំនងអ្នកទាំងពីរតាំងពីដើមទីរហូតមកដល់បច្ចុប្បន្ន គឺត្រឹមតែជាមិត្តរួមអាជីពក្នុងក្រុមតែប៉ុណ្ណោះ មិនឈានដល់ស្នេហាដូចការលើកឡើងឡើយ។” បងអើយឲ្យតែខ្ញុំថតជាមួយគ្នាដឹងថា មានស្នេហ៍ជាមួយគ្នា កាលជាមួយពែកមី ឡើងវិលមុខរឿងហ្នឹងហើយ លូវដល់នាយកៃដទៀត អត់មានទេបង” ខ្ញុងថ្លែងបញ្ជាក់។
កន្លងមកខ្ញុងល្បីមានអ្នកតាមស្រឡាញ់ច្រើន រហូតដល់អ្នកក្រៅស្រុកក៏មានដែល។ ប៉ុន្តែគូគាប់ថ្មីនាងអាចយកបានទាល់តែកូនប្រុសនាងពេញចិត្តទើបពេញបំណងបានហើយនាយកៃដរ មិនដឹងត្រូវចិត្តកូនប្រុសខ្ញុងឬអត់ទេ៕
