ភ្នំពេញៈ បុរសថ្លើមធំម្នាក់ បានកាន់ដាវមួយដើម ទៅគំរាមក្រុមសន្តិសុខ យកផ្លែឈើហូប ត្រូវបានក្រុមសន្តិសុខ សហការគ្នាចាប់ឃាត់ខ្លួន រួចប្រគល់ទៅឲ្យសមត្ថកិច្ចជាអ្នកដោះស្រាយទាំងយប់តែម្តង។
ហេតុការណ៍នេះ បានកើតឡើងកាលពីវេលាម៉ោង១២និង៣០នាទីយប់ឈានចូលថ្ងៃទី២៦ ខែកញ្ញា ឆ្នាំ២០១៧ តាមបណ្តោយផ្លូវលេខ២០១១ ចំណុចមុខផ្សារឈូកមាស ស្ថិតក្នុងសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
សមត្ថកិច្ច បានឲ្យដឹងថា បុរសដែលឃាត់ខ្លួនឈ្មោះ ពេជ្រ ច័ន្ទធី ភេទប្រុស អាយុ៣០ឆ្នាំ មុខរបររត់ម៉ូតូឌុប ទីកន្លែងស្នាក់នៅបច្ចុប្បន្ន សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ប្រភពព័ត៌មានពីក្រុមសន្តិសុខ បានឲ្យដឹងថា មុនកើតហេតុ ពួកគាត់បានយាមការនៅផ្សារឈូកមាសជាធម្មតា លុះមកដល់វេលាកើតហេតុខាងលើ ក៏មានបុរសម្នាក់ កាន់ដាវមួយដើម ដើរសំដៅទៅកន្លែងលក់ផ្លែឈើមួយកន្លែង ដែលម្ចាស់គេមិនបាននៅ ហើយបានយកផ្លែឈើ ៣ទៅ៤ខាំ មកហូប ភ្លាមៗនោះ ក្រុមសន្តិសុខក៏និយាយថា ហែកយកផ្លែឈើគេធ្វើអី ខណ:នោះ បុរសរូបនោះ ក៏ឆ្លើយថា យកទៅស៊ី ហើយបានដកដាវមួយដើមគំរាមក្រុមសន្តិសុខថែមទៀតផង។
ក្រុមសន្តិសុខបន្តថា ក្រោយពេលបុរសរូបនោះ យកផ្លែឈើគេទៅហូបហើយ ពួកគាត់ក៏បាន សហការគ្នា ចូលទៅចាប់ឃាត់បុរសរូបនោះភ្លាមៗ ហើយទាក់ទងទៅសមត្ថកិច្ចអោយចុះមកនាំខ្លួនបុរសរូបនោះ ទៅធ្វើការសួរនាំនៅអធិការដ្ឋាននគរបាលខណ្ឌសែនសុខទាំងយប់តែម្តង។
បច្ចុប្បន្នបុរសខាងលើ ត្រូវបានសមត្ថកិច្ចធ្វើការឃុំខ្លួន ដើម្បីធ្វើការអប់រំ និងចាត់ការតាមនីតិវីធីច្បាប់៕
