ខេត្តកណ្តាល៖ បុរសម្នាក់ត្រូវបានប្រជាពលរដ្ឋស្វាគមន៍ម្នាក់ៗមួយដៃៗ ក្រោយពីចូលលួចរបស់របរនិងទូរស័ព្ទដៃក្នុងឃ្លាំងដាក់រថយន្ត របស់ឈ្មោះ ទី សេងចាំង ភេទ ប្រុស អាយុ៣២ឆ្នាំ ស្ថិតនៅភូមិ ព្រែកបាឡាត់ឆឹង ឃុំ ត្រើយស្លា ស្រុក ស្អាង កាលពីវេលាប្រមាណម៉ោង២:៣៥នាទី ឈានចូលថ្ងៃទី០៩.០៩.២០១៧នេះ ។
តាមសមត្ថកិច្ចស្រុកស្អាងឲ្យដឹងថា ជនសង្ស័យមានឈ្មោះ ឃីម សុធា (អោក ) ភេទ ប្រុស អាយុ ៣០ឆ្នាំនៅភូមិ ព្រែកប៉ាន ឃុំត្រើយស្លា ស្រុក ស្អាង មុខរបរ មិនពិតប្រាកដ។ ពាក់ព័ន្ធនឹងរឿងហេតុសមត្ថកិច្ចបានបញ្ជាក់ថា នៅពេលកន្លងមកនៅក្នុងឃ្លាំងរបស់ជនរងគ្រោះ បានបាត់ទូរស័ព្ទចំនួន០៣គ្រឿង បូមឡាននិងអាគុយ។
លុះដល់ថ្ងៃទី០៩.០៩.២០១៧ ឈ្មោះ ឃីម សុធា (អោក) បានលួចចូលតាមទ្វារខាងក្រោយហើយបាន រើ កកាយ កន្លែងដាក់សម្ភារៈ ហើយលួចយក ទូរស័ព្ទដៃនិងបូមរថយន្តភ្លាមនោះមាន ឈ្មោះ នី ស៊ីតាក់ បានភ្ញាក់ពីដេកឃើញជនសង្ស័យកំពុងលួចសម្ភារៈ ក៏ស្រែកឆោឡោផ្អើលដល់កម្មករផ្សេងទៀតដែលកំពុងដេកក្បែរនោះ និង បាននាំគ្នាដេញដោយស្រែកថា ចោរៗ រួចជនសង្ស័យក៏បានរត់គេចខ្លួន ហើយក៏ត្រូវប្រជាពលរដ្ឋជាច្រើនបានវាយឲ្យសន្លប់មិនដឹងខ្លួន។
ពេលនោះសមត្ថកិច្ចប៉ុស្តិ៍បានទៅដល់ ឃើញជនសង្ស័យ ដេកសន្លប់មិនដឹងខ្លួន ក៏បានហៅឡានពេទ្យដឹកយកទៅសង្រ្គោះ នៅមន្ទីរពេទ្យជ័យជំនះ នៅក្រុងតាខ្មៅ។ សូមបញ្ជាក់ថា ឈ្មោះ ឃីម សុធា ( អោក) នេះជាមុខសញ្ញា ដែលលួចយ៉ាងសកម្ម និងជួញដូរគ្រឿងញៀន ហើយធ្លាប់ជាប់ពន្ធនាគារ ចំនួន០២ដង៕
