សារព័ត៌មានផ្លូវការកូរ៉េខាងជើង KCNA បានព្រមានឯកអគ្គរដ្ឋទូតអាមេរិកប្រចាំអង្គការសហប្រជាជាតិលោកស្រី Nikki Haley បាននិយាយថា ក្រុងព្យុងយ៉ាង សុំទានសង្គ្រាម អំឡុងភាពតានតឹងនៅលើឧបទ្វីបកូរ៉េ កើនឡើង។ នេះបើយោងតាមគេហទំព័រសារព័ត៌មាន រុស្ស៊ី (RT) បានចុះផ្សាយនាយប់ថ្ងៃសុក្រ ទី០៨ ខែកញ្ញា ឆ្នាំ២០១៧។
កាលពីថ្ងៃចន្ទដើមសប្ដាហ៍នេះ លោកស្រី Haley បាននិយាយនៅក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិថា ការសាកល្បងនុយក្លេអ៊ែរ និងមីស៊ីល ដែលធ្វើការជាបន្តបន្ទាប់របស់កូរ៉េខាងជើង អាចបង្កឲ្យមានជម្លោះយោធាជាមួយអាមេរិក។
KCNA បាននិយាយាថា "លោកស្រី Haley ជា ស្រីពេស្យានយោបាយ និងគួរតែប្រុងប្រយ័ត្នអណ្ដាតរបស់នាង ទោះបីជានាងជាមនុស្សល្ងីល្ងើក៏ដោយ ហើយវាអាចមានផលវិបាកធ្ងន់ធ្ងរដល់សហរដ្ឋអាមេរិកថែមទៀតផង"។
អ្នកការទូតរបស់វិមានក្រឹមឡាំងលោក Dmitry Peskov បានអំពាវនាវថា "ទីក្រុងព្យុងយ៉ាង ចាំបាច់ត្រូវតែចូលរួមនៅក្នុងការសន្ទនាគ្នា ដើម្បីស្វែងរកដំណោះស្រាយ កាត់បន្ថយភាពតានតឹងនៅឧបទ្វីបកូរ៉េ"។
ជុំវិញបញ្ហានេះ ប្រទេសរុស្ស៊ី និងចិន បានស្នើឲ្យមានផែនការទ្វេដង ដែលគេមើលឃើញថា ក្រុងព្យុងយ៉ាង ត្រូវព្យួរគ្រោងការសាកល្បងកាំជ្រួចមីស៊ីល និងនុយក្លេអ៊ែរថ្មីៗរបស់ខ្លួន ដើម្បីជាថ្នូរនឹងសមយុទ្ធយោធារួមរវាងអាមេរិក និងកូរ៉េខាងត្បូង៕
