ប្រភពរបស់គណបក្សភឿថៃ បានប្រាប់ទូរទស្សន៍ CNN កាលពីថ្ងៃព្រហស្បតិ៍ថា អតីតនាយករដ្ឋមន្ត្រីថៃលោកស្រី យីងឡាក់ ស៊ីណាវ៉ាត្រា កំពុងស្ថិតនៅទីក្រុងឡុង និងស្វែងរកសិទ្ធជ្រកកោននៅចក្រភពអង់គ្លេសផងដែរ។
ការិយាល័យចក្រភពអង់គ្លេស ដែលទាក់ទងនឹងកម្មវិធីសុំសិទ្ធជ្រកកោន បានប្រាប់ CNN ថា ខ្លួនមិនបានធ្វើការអត្ថាធិប្បាយណាមួយ លើករណីបុគ្គលនោះទេ។ នាយករដ្ឋមន្ត្រីថៃលោក Prayut Chan-o-cha បាននិយាយកាលពីថ្ងៃព្រហស្បតិ៍ថា លោកស្រី យីងឡាក់ កំពុងលាក់ខ្លួននៅទីក្រុងឌូបៃ ជាមួយបងប្រុសរបស់លោកស្រី ដែលត្រូវនិរទេសខ្លួនពីប្រទេសកំណើត។
គួរបញ្ជាក់ផងដែរថា តុលាការកំពូលថៃ បានកាត់ទោសលោកស្រី យីងឡាក់ ឲ្យជាប់គុកចំនួន ៥ឆ្នាំ ពីបទចំណាយថវិកាជាតិរាប់ពាន់លានដុល្លារ ដើម្បីប្រមូលទិញស្រូវពីប្រជាជនក្នុងតម្លៃខ្ពស់ ព្រមទាំងចោទប្រកាន់លោកស្រី ដែលបានរត់ភៀសខ្លួន នឹងមិនមានវត្តមានសម្រាប់សាលក្រម និងការផ្ដន្ទាទោស៕
