មានហេតុការណ៍ផ្ទុះឆេះសាលារៀន នៅរដ្ឋធានីកូឡាឡាំពួរ ប្រទេសម៉ាឡេស៊ី បណ្ដាលឲ្យកូនសិស្ស និងគ្រូបង្រៀនស្លាប់ និងរងរបួសជាច្រើននាក់។ នេះបើយោងតាមគេហទំព័រសារព័ត៌មាន រុស្ស៊ី (RT) បានចុះផ្សាយនាព្រឹកថ្ងៃព្រហស្បតិ៍ ទី១៤ ខែកញ្ញា ឆ្នាំ២០១៧។
មន្ត្រីជាន់ខ្ពស់ពន្លត់អគ្គីភ័យម៉ាឡេស៊ីលោក Khirudin Drahman បាននិយាយថា ហេតុការណ៍អគ្គីភ័យខាងលើអគ្គីភ័យ កើតឡើងនៅវេលាម៉ោង ៥៖៤០នាទីព្រឹក (ម៉ោងក្នុងស្រុក) បណ្ដាលឲ្យកូនសិស្ស និងគ្រូបង្រៀន ២៣នាក់ និងអ្នកយាមសាលា ០២នាក់ស្លាប់ ព្រមទាំងមនុស្ស ០៧នាក់ផ្សេងទៀតរងរបួសធ្ងន់ ហើយត្រូវបញ្ជូនទៅកាន់មន្ទីរពេទ្យភ្លាមៗ។
ជុំវិញបញ្ហានេះ លោក Drahman បានថ្លែងថា "ខ្ញុំគិតថា វាជាគ្រោះអគ្គីភ័យដ៏អាក្រក់បំផុតក្នុងប្រទេសម៉ាឡេស៊ី ក្នុងរយៈពេល ២០ឆ្នាំចុងក្រោយនេះ ឥឡូវនេះយើងកំពុងស៊ើបអង្កេតរកមូលហេតុនៃអគ្គីភ័យផងដែរ"៕
