ព្រឹកមិញនេះលោក សុវណ្ណ រីទ្ធី ហៅ តាវិទ័រ បានចេញសារមួយនៅលើហ្វេសប៊ុករបស់ខ្លួន ដោយលោកបានបង្ហាញនូវសំណេរមិនសប្បាយចិត្ត ខណៈដែលកូនស្រី វ៉ាន់ នីឡា បានក្លាយជាជនរងគ្រោះ ដោយទទួលរងភាពអយុត្តិធម៌៥លើក ព្រោះតែមានអ្នកលួចហ្វេសប៊ុក និងបានប្រើពាក្យសម្តីមិនសមរម្យ ដែលធ្វើឲ្យមហាជនជាច្រើនយល់ច្រឡំថា ពាក្យសម្ដី ឬសំណេរទាំងនោះជារបស់កូនស្រីលោក។
នេះគឺជាសាររបស់លោក សុវណ្ណ រីទ្ធី ដែល Kqube ចំលងមកទាំងស្រុង "តើកូនខ្ញុំខុសអី? បានជាបង្ខូចកិត្តិយសនាង បានចេះតែធ្វើបាបនាង សូម្បីតែហ្វេសប៊ុកFBក៏មិនអាចដាក់ឈ្មោះខ្លួនឯងបាន អោយតែបង្កើតអាខោន FB ឈ្មោះនីឡាគឺត្រូវគេលួចរហូត។ ខ្ញុំសូមជម្រាបថាហ្វេសប៊ុក ដែលមាន ឈ្មោះនីឡា គឺមិនមែនរបស់នាងទេ ក្នុងរូបនេះទើបជាអាខោនពិតរបស់នីឡា ។ ការសសេរបង្ហោះដោយប្រើពាក្យមិនសមរម្យមិនមែនជាសាមីខ្លួនទេ បងប្អូនមួយចំនួនតូចឈប់ដៀលត្មះទៅ។ កុំចាំទាល់តែប៉ះសាច់ឯងទើបឈឺនោះ។ យើងកាន់ព្រះពុទ្ធសាសនា គួរគិតពីបុណ្យបាបផង។ បងប្អូនសូមជួយShareផង ខ្ញុំសុំគោរពថ្លែង អំណរគុណពីចម្ងាយ"។
ជាមួយគ្នានេះដែរ តាវិទ័រ បានបញ្ជាក់ជាមួយលោក តាន់ ចន្ថា អ្នកយកព័ត៌មាន Kqube ថា " ប្អូនអើយមិនក្រោម៥លើកទេដែលហ្វេសប៊ុក នីឡា កូនស្រីខ្ញុំត្រូវបានគេលួចយក និងបានប្រើពាក្យសម្ដី និងសំណេរមិនល្អជាច្រើន ដែលធ្វើឲ្យអ្នកគាំទ្រថាគាត់ជាអ្នកនិយាយ និងសរសេរ។ ខ្ញុំមិនយល់ទេមិនដឹងអ្នកលួចហ្វេសប៊ុកនេះមានចេតនាអ្វីមកលើកូនស្រីទេ បានជាចូលចិត្តធ្វើបាបគាត់ឲ្យទទួលរងនូវភាពអយុត្តិធម៌ និងមានគេរិះគន់ដោយមិនដឹងខ្លួនដូច្នេះ?
លោក សុវណ្ណ រិទ្ធី បន្តថា "ហ្វេសប៊ុកខ្លះទើបបើកបានFriends តែពីរនាក់ក៏គេចូលយកទៅផុសអ្វីផ្ដេសផ្ដាសដែរ គឺធ្វើឲ្យកូនស្រីខ្ញុំរងគ្រោះរហូតលែងទាំងហ៊ានបង្កើតដាក់ឈ្មោះ នីឡា ទៅទៀតនៅពេលនេះ ហើយតាមរយៈពេលមាននេះខ្ញុំសុំឲ្យអ្នកដែលមានចេតនាអាក្រក់មកលើកកូនស្រីខ្ញុំបោះបង់ទង្វើនេះទៅ ព្រោះវាមិនមានប្រយោជន៍អ្វីទេ ហើយក៏គួរតែអាណិតក្មេងស្រី ជាអ្នកសិល្បៈ បែរមកទទួលរងថ្មបាក់គ្រប់ពេលដូច្នេះ៕
