កងកម្លាំងទីក្រុង Seoul ជាច្រើនពាន់នាក់ ត្រូវបានដាក់ពង្រាយ ដើម្បីទប់ស្កាត់ក្រុមអ្នកប្រឆាំងតវ៉ា ប្រព័ន្ធការពារមីស៊ីលរបស់សហរដ្ឋអាមេរិក (THAAD) ដែលត្រូវបានគេដឹកជញ្ជូនមក កាលពីព្រឹកម្សិញ ទៅភាគអាគ្នេយ៍ប្រទេសកូរ៉េខាងត្បូង។ នេះបើយោងតាមគេហទំព័រសារព័ត៌មាន xinhua បានចុះផ្សាយនាព្រឹកថ្ងៃព្រហស្បតិ៍ ទី០៧ ខែកញ្ញា ឆ្នាំ ២០១៧។
នៅម៉ោងប្រហែល ៨៖១០នាទីព្រឹក (ម៉ោងក្នុងស្រុក) រថយន្តដឹកជញ្ជូនប្រព័ន្ធការពារមីស៊ីល ចំនួន ៤គ្រឿង និងម៉ាស៊ីនផ្គត់ផ្គង់ថាមពលអគ្គិសនី ទៅភូមិ Soseong ស្រុក Seongju ភាគខាងជើងខេត្ត Gyeongsang។ ក្រុមអ្នកតវ៉ា ត្រូវបានរារាំងដោយប៉ូលិសកុប្បកម្មប្រហែល ៨ពាន់នាក់ បានចាប់ផ្ដើមយុទ្ធនាការបំបែកអ្នកប្រឆាំងតវ៉ាចំនួន ៤០០នាក់ និងប្រជាជន ដែលរស់នៅក្នុងទីក្រុងស៊ុងជូ និងទីក្រុងជីមថុនដែលនៅជាប់ព្រំដែនផងដែរ។
យោងតាមប្រព័ន្ធផ្សព្វផ្សាយក្នុងស្រុក បានរាយការណ៍ឲ្យដឹងថា ការប៉ះទង្គិច ដោយហិង្សាខាងលើ បណ្ដាលឲ្យមានមនុស្សជិត ៣០នាក់រងរបួស ហើយត្រូវបានបញ្ជូនទៅកាន់មន្ទីរពេទ្យក្បែរនោះភ្លាមៗ។
គួរបញ្ជាក់ផងដែរថា ប្រព័ន្ធការពារមីស៊ីលនេះ ក្នុងគោលបំណងទប់ស្កាត់ការគំរាមកំហែងផ្នែកសន្តិសុខពីសំណាក់មីស៊ីល និងអាវុធនុយក្លេអ៊ែររបស់ទីក្រុងព្យុងយ៉ាង ដែលទើបតែបំផ្ទុះក្បាលគ្រាប់ជាលើកទី០៦ កាលពីថ្ងៃអាទិត្យ ធ្វើឲ្យរញ្ជួយដល់សហគមន៍អន្តរជាតិ៕
