មេដឹកនាំកូរ៉េខាងជើងលោក គីម ជុងអ៊ុន បានប្រាប់មន្ត្រីការពារជាតិ ក្នុងអំឡុងពេលធ្វើតេស្តចុងក្រោយបង្អស់របស់ IRBM ថា ក្រុងព្យុងយ៉ាង ត្រូវតែខិតខំប្រឹងប្រែងសមត្ថភាពឲ្យកាន់ខ្លាំង ដូច ទីក្រុងវ៉ាស៊ីនតោន និងឧបទ្វីបកូរ៉េ ដើម្បីឲ្យប្រធានាធិបតីអាមេរិក មិនហ៊ាននិយាយអំពីជម្រើសយោធា។ នេះបើយោងតាមគេហទំព័រសារព័ត៌មាន រុស្ស៊ី (RT) បានចុះផ្សាយនាព្រឹកថ្ងៃសៅរ៍ ទី១៦ ខែកញ្ញា ឆ្នាំ២០១៧។
យោងតាមទីភ្នាក់ងារព័ត៌មាន KCNA របស់កូរ៉េខាងជើង បាននិយាយថា គោលដៅចុងក្រោយរបស់ក្រុងព្យុងយ៉ាង គឺដើម្បីបង្កើតតុល្យភាពនៃកម្លាំងជាក់ស្ដែងជាមួយសហរដ្ឋអាមេរិក និងធ្វើឲ្យមេដឹកនាំអាមេរិក មិនហ៊ាននិយាយអំពីជម្រើសយោធា ជាមួយកូរ៉េខាងជើង។ លោក គីម បានសង្កត់ធ្ងន់ពីតម្រូវការក្នុងការពន្លឿនកម្មវិធីនុយក្លេអ៊ែរ និងបន្តពង្រឹងសមត្ថភាពយោធា សម្រាប់ការវាយប្រហារនុយក្លេអ៊ែរ ដែលសហរដ្ឋអាមេរិក មិនអាចដោះស្រាយបាន។
អ្នកប្រឹក្សាយោបល់ផ្នែកសន្តិសុខជាតិរបស់សេតវិមាន លោក H.R McMaster បាននិយាយថា "យើងធ្វើការអំពាវនាវដល់ប្រទេសទាំងអស់ សូមអ្នករាល់គ្នាធ្វើអ្វីៗគ្រប់យ៉ាង ដើម្បីដោះស្រាយបញ្ហាជាសកលលោក ដោយមិនមានសង្គ្រាម និងប្រើពាក្យមួយឃ្លាថា យើងមិនទាត់កំប៉ុងទៅលើផ្លូវ រួចហើយដើរចេញនោះទេ"។
គួរបញ្ជាក់ផងដែរថា ប្រទេសរុស្ស៊ី និងចិន បានស្នើឲ្យមានដំណោះស្រាយទ្វេរដង ចំពោះវិបត្តិនេះ ដែលសហរដ្ឋអាមេរិក ឈប់ធ្វើសមយុទ្ធជាមួយកូរ៉េខាងត្បូង ជាថ្នូរនឹងកូរ៉េខាងជើង បញ្ឈប់កម្មវិធីអាវុធរបស់ខ្លួន៕
