កោះកុង៖ ចំពោះករណីឃាតកម្ម ដែលបានកើតឡើងកាលពីម្សិលមិញ នៅវេលាម៉ោង ១៦:០០ នាទីល្ងាច នៅចំណុចភូមិចាំយាម ឃុំប៉ាក់ខ្លង ស្រុកមណ្ឌលសីមា បច្ចុប្បន្ន កម្លាំងសមត្ថកិច្ចយើង បានសហការជាមួយប្រជាពលរដ្ឋ និងលោកមេភូមិ ធ្វើការឃាត់ខ្លួនមុខសញ្ញាសង្ស័យបានហើយ ។
ជនសង្ស័យឈ្មោះ នួន សុធា ហៅ តឿ ភេទប្រុស អាយុ ១៥ឆ្នាំ មុរបរ កម្មករ ត្រូវបានកម្លាំងយើងឃាត់ខ្លួន នៅវេលាម៉ោង ១១:៣០ នាទីព្រឹក នៅចំណុចក្នុងព្រៃ ស្ថិតក្នុងភូមិព្រែកស្វាយ សង្កាត់ស្ទឹងវែង ក្រុងខេមរភូមិន្ទ ដោយជនរូបនេះ បង្កបទល្មើសហើយ លួចរត់មកពួននៅក្នុងព្រៃ។
ករណីនេះកំលាំងជំនាញយើង កំពុងបំពេញសំណុំរឿង បញ្ជូនទៅសាលាដំបូងខេត្ត ចាត់ការតាមនិតិវិធីច្បាប់៕
បញ្ជាក់៖ នៅថ្ងៃទី ៧ ខែ កញ្ញា ឆ្នាំ ២០១៧ នៅវេលាម៉ោង ៤:០០ នាទីល្ងាច យុវជនម្នាក់ត្រូវបានឃាតករមិនស្គាល់អត្តសញ្ញាណធ្វើសកម្មភាពស្ទាក់វាយនឹងចាក់សម្លាប់យ៉ាងសាហាវបំផុត ដោយប្រើអម្បែងដប នៅចំណុចឃ្លាំងខាងក្រោយផ្សារភូមិចាំយាម ឃុំប៉ាក់ខ្លង ស្រុកមណ្ឌលសីមា មានករណីឃាតកម្ម (យកដបវាយអោយបែក រួចយកទៅចាក់លើជនរងគ្រោះ) ។
ជនរងគ្រោះមានឈ្មោះ តាំ វ៉ាន់ឆៃ ភេទប្រុស អាយុ ១៧ឆ្នាំ មុខរបរ កម្មករ បានស្លាប់ពេលបញ្ជូនមកព្យាបាលនៅមន្ទីរពេទ្យបង្អែកខេត្ត រីឯជនសង្ស័យបានរត់គេចខ្លួនបាត់។
ករណីនេះកំលាំងជំនាញយើង កំពុងស្រាវជ្រាវរកជនសង្ស័យយកមកផ្តន្ទាទោសទៅតាមផ្លូវច្បាប់ រីឯសពរងគ្រោះ ប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ក្រោយកម្លាំងយើងធ្វើកោសល្យវិច្ច័យរួច៕
