ភ្នំពេញៈ បុរសម្នាក់ បានអះអាងខ្លួនជាឧត្ដមសេនីយ៍ បានព្យាយាមបើករថយន្តរត់ ប៉ុន្តែត្រូវសមត្ថកិច្ចចំនួន២ខណ្ឌ សហការគ្នាចាប់បាន ក្រោយឧត្តមសេនីយ៍រូបនេះ បង្កហិង្សាលើសន្តិសុខរោងចក្រម្នាក់ បណ្ដាលឲ្យរបួស ត្រូវបានបញ្ជូនទៅព្យាបាលនៅមន្ទីរពេទ្យភ្លាមៗផងដែរ។
ហេតុការណ៍ដ៏ភ្ញាក់ផ្អើលនេះ បានកើតឡើងកាលពីវេលាម៉ោង១០និង០៥នាទីយប់ថ្ងៃទី៥ ខែតុលា ឆ្នាំ២០១៧ ស្ថិតតាមបណ្តោយផ្លូវជាតិលេខ៥ ក្នុងសង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។
ប្រភពព័ត៌មានពីប្រជាពលរដ្ឋ ដែលឃើញហេតុការណ៍ បានឲ្យដឹងថា បុរសជាឧត្ដមសេនីយ៍ខាងលើ បានប្រើអំពើហិង្សាលើសន្តិសុខ ដែលជាអ្នកយាមរោងចក្រមួយកន្លែងមានឈ្មោះ Sportex និងបានយកស្ពាយបាញ់ចូលភ្នែកសន្តិសុខរូបនោះទៀត បណ្តាលឲ្យសន្តិសុខរូបនោះរងរបួស ត្រូវបានគេដឹកយកទៅមន្ទីរពេទ្យធ្វើការព្យាបាលភ្លាមៗតែម្តង ហើយឧត្តមសេនីយ៍រូបនោះ ក៏បានព្យាយាមបើករថយន្តរត់គេចខ្លួន តាំងពីខណ្ឌឫស្សីកែវ រហូតចូលមកដល់ខណ្ឌព្រែកព្នៅ ក៏សមត្ថកិច្ចខណ្ឌឫស្សីកែវ សហការជាមួយសមត្ថកិច្ចខណ្ឌព្រែកព្នៅ ឃាត់បានទាំងរថយន្ត ទាំងមនុស្ស។
ប្រភពពីសមត្ថកិច្ច ដែលស្ថិតក្នុងហេតុការណ៍ បានឲ្យដឹងថា នៅពេលដែលឃាត់រថយន្តខាងលើ អ្នកបើកបររថយន្ត បានចុះមក ហើយបានអួតខ្លួនប្រាប់សមត្ថកិច្ចថា គាត់ គឺជាឧត្តមសេនីយ៍ ហើយបានប្រើពាក្យមិនសមគួរដាក់សមត្ថកិច្ចទៀតផង។
ដោយឡែក បុរសដែលអះអាងថាខ្លួនជាឧត្តមសេនីយ៍ បានរៀបរាប់ថា មុនពេលកើតហេតុ រូបគាត់ បានបើករថយន្តម៉ាក ឡិចស៊ីស LX 470 ពណ៌ស ពាក់ស្លាកលេខភ្នំពេញ 2AF- 6181 ធ្វើដំណើរតាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូង ខណ:ពេលកំពុងតែធ្វើដំណើរ ស្រាប់តែមានរថយន្តកុងតឺន័រមួយគ្រឿង មិនចាំស្លាកលេខ បើកបរបញ្ច្រាសទិសគ្នា បានបើកចូលមកផ្លូវរបស់គាត់ ដោយមិនស៊ីញូ និងឈប់កាក់មុខរថយន្តគាត់ទៀត ពេលនោះគាត់ក៏បានដើរទៅសួរអ្នកបើកបររថយន្ត កុងទឺន័រថា តើប្អូនមានប័ណ្ណបើកបរដែរ ឬក៏អត់ ចំណែកអ្នកបើកបររថយន្តកុងតឺន័រ ឆ្លើយថា គាត់មាន។ គាត់ (ឧត្តមសេនីយ៍) បន្តសួរទៀតថា បើប្អូនមានប័ណ្ណបើកបរ តើប័ណ្ណនោះធ្វើត្រូវ ឬក៏ខុស បើផ្លូវនៅខាងនោះ ហើយប្អូនបើកបត់ចូលមកផ្លូវរបស់គេ។
បុរសខាងលើ បានបន្ថែមទៀតថា ខណៈពេលកំពុងជជែកគ្នា អ្នកបើកបររថយន្តកុងតឺន័រ បានដើរចូលទៅរោងចក្រ Sportex ភ្លាមៗនោះ លោកក៏បានដើរតាម ហើយហៅអ្នកបើកបររថយន្ត កុងតឺន័រ ឲ្យត្រឡប់មកនិយាយគ្នាវិញ រំពេចនោះ ក៏មានប្រធានសន្តិសុខម្នាក់ ក្នុងរោងចក្រ បានហៅឲ្យសន្តិសុខ ដែលយាមទ្វារឲ្យបិទទ្វាររោងចក្រ ដើម្បីឃាត់រូបគាត់ តែគាត់ក៏បានដើរ ទៅរុញសន្តិសុខ ដែលជាអ្នកយាមទ្វារនោះចេញ ដើម្បីកុំសនិ្តសុខឲ្យបិទទ្វារ ហើយគាត់ក៏បានទូរស័ព្ទទាក់ទងទៅខាងសមត្ថកិច្ចឲ្យមកអន្តរាគមន៍ ពេលសមត្ថកិច្ចចុះមកដល់ សមត្ថកិច្ចក៏បានឲ្យគាត់ចាកចេញពីកន្លែងកើតហេតុតែម្តង។
បុរសខាងលើ បានប្រាប់ទៀតថា ក្នុងរឿងនេះដែរ គឺរូបលោកមិនបានបើករថយន្តរត់គេចនោះទេ គឺរូបលោកបានបើករថយន្តមកតាមផ្លូវធម្មតាតែប៉ុណ្ណោះ។
ជុំវិញរឿងនេះដែរ បច្ចុប្បន្នបុរស ដែលអះអាងខ្លួនថា ជាឧត្តមសេនីយ៍នោះ ត្រូវបានសមត្ថកិច្ចខណ្ឌព្រែកព្នៅ ប្រគល់ឲ្យសមត្ថកិច្ចប៉ុស្តិ៍នគរបាលរដ្ឋបាលគីឡូម៉ែត្រលេខ៦ ខណ្ឌឬស្សីកែវវិញ ហើយសមត្ថកិច្ចក៏ឃាត់ទាំងរថយន្ត និងមនុស្ស ដើម្បីសួរនាំ ហើយរង់ចាំភាគីសន្តិសុខ ចូលខ្លួនមកធ្វើការដោះស្រាយគ្នាតាមផ្លូវច្បាប់៕
