ភ្នំពេញៈ លោក សុខ ឥសាន អ្នកនាំពាក្យគណបក្សប្រជាជនកម្ពុជា (CPP) បានបញ្ជាក់ថា ក្រោយពីមានពាក្យបណ្តឹងរបស់ក្រសួងមហាផ្ទៃ ស្នើសុំឲ្យតុលាការកំពូល ពិនិត្យពីបទល្មើសរបស់គណបក្សសង្គ្រោះជាតិ (CNRP) ប្រឈមនឹងច្បាប់ ស្តីពីគណបក្សនយោបាយនោះ មានមតិមួយចំនួនថា លទ្ធិប្រជាធិបតេយ្យនៅកម្ពុជា កំពុងដើរថយក្រោយ ប៉ុន្តែពួកគេយល់ច្រឡំហើយ គឺមិនមានដើរថយក្រោយទេ។
អ្នកនាំពាក្យគណបក្សកាន់អំណាច បន្តតាមរយៈសារតេឡេក្រោម នៅថ្ងៃទី១៣ ខែតុលា ឆ្នាំ២០១៧ថា តាមពិតប្រជាធិបតេយ្យនៅកម្ពុជា កាន់តែត្រូវបានពង្រឹងទៅវិញទេ ដោយសារការពង្រឹងនីតិរដ្ឋរបស់រាជរដ្ឋាភិបាល តាមរយៈការអនុវត្តច្បាប់ ចំពោះគណបក្សដែលបានប្រព្រឹត្តល្មើសច្បាប់ដូច CNRP ជាដើម។
លោកបញ្ជាក់ថា “ការអនុវត្តច្បាប់ គឺជាមធ្យោបាយតែមួយគត់ ក្នុងការធានាដំណើរការលទ្ធិប្រជាធិបតេយ្យ កាន់តែល្អប្រសើរឡើង។ បច្ចុប្បន្ននេះ កម្ពុជា កំពុងដើរលើផ្លូវត្រូវ ក្នុងការពង្រឹងលទ្ធិប្រជាធិបតេយ្យ ស្របតាមស្មារតីនៃកិច្ចព្រមព្រៀងទីក្រុវប៉ារីស កាលពីថ្ងៃទី២៣ ខែតុលា ឆ្នាំ១៩៩១មកម្ល៉េះ មិនមែដើរថយក្រោយនោះទេ”។
លោក សុខ ឥសាន ថា តើដំណើការលទ្ធិប្រជាធិបតេយ្យនៅកម្ពុជា ថយក្រោយមែនទេ? ក្រោយពីមានពាក្យបណ្តឹងរបស់ក្រសួងមហាផ្ទៃ ស្នើសុំឲ្យតុលាការកំពូល ពិនិត្យពីបទល្មើសរបស់គណបក្សប្រឆាំង ប្រឈមនឹងច្បាប់ស្តីពីគណបក្សនយោបាយនោះ មានមតិមួយចំនួនបានវាយតម្លៃថា លទ្ធិប្រជាធិបតេយ្យនៅកម្ពុជា ដើរថយក្រោយ។
លោកបន្ថែមថា ដើម្បីធានានិរន្តរភាពលទ្ធិប្រជាធិបតេយ្យឲ្យដំណើរបានល្អ និងរីកចម្រើន មានតែនាំគ្នាគោរពច្បាប់ និងអនុវត្តន៍ច្បាប់ឲ្យបានត្រឹមត្រូវតែប៉ុណ្ណោះ។ ម៉្យាងទៀត ចង់វាយតម្លៃដំណើរការលទ្ធិប្រជាធិបតេយ្យល្អ ឬអាក្រក់ អាស្រ័យលើការអនុវត្តច្បាប់ ហើយគណបក្សណារំលោភច្បាប់ ត្រូវតែទទួលខុសត្រូវចំពោះមុខច្បាប់៕
