អ្នកនាំពាក្យក្រសួងការពារជាតិរុស្ស៊ី បានប្រាប់ឲ្យដឹងថា នាវាមុជទឹកមួយគ្រឿង បានបាញ់មីស៊ីល Kalibr ចេញពីសមុទ្រមេឌីទែរ៉ាណេ ដែលក្នុងគោលបំណងវាយប្រហារឲ្យចំគោលដៅ ក្រុមភេរវជន នៅក្នុងប្រទេសស៊ីរី។ នេះបើយោងតាមគេហទំព័រសារព័ត៌មាន រុស្ស៊ី (RT) បានចុះផ្សាយនាយប់ថ្ងៃព្រហស្បតិ៍ ទី០៦ ខែតុលា ឆ្នាំ២០១៧។
អ្នកនាំពាក្យក្រសួងការពារជាតិរុស្ស៊ីលោក Igor Konashenkov បាននិយាយថា នាវាមុជទឹក Veliky Novgorod និង Kolpino បានបាញ់មីស៊ីលចំនួន ១០គ្រាប់ កាលពីព្រឹកម្សិលមិញ ចេញពីសមុទ្រមេឌីទែរ៉ាណេ ដែលក្នុងគោលបំណងវាយប្រហារឲ្យចំគោលដៅ ក្រុមភេរវជន នៅក្នុងប្រទេសស៊ីរី។ ក្រសួងការពារជាតិ បានបន្ថែមទៀតថា មុនពេលបាញ់មីស៊ីលនេះ ក្រុងមូស្គូបានឃ្លាំមើល និងរកឃើញគោលដៅរបស់រដ្ឋឥស្លាម ISIS / ISIL នៅក្នុងទីក្រុង Deir-ez-Zor រួមទាំងមជ្ឈមណ្ឌលបញ្ជាការធំៗ និងឃ្លាំងស្តុកអាវុធផងដែរ។
គួរបញ្ជាក់ផងដែរថា កាលពីខែកញ្ញា យោធារុស្ស៊ី បានស៊ើបការណ៍ពីលើអាកាស ហើយបង្ហាញពីទីតាំងកងកម្លាំងពិសេសអាម៉េរិក នៅក្នុងរដ្ឋអ៊ីស្លាម ដែលគ្រប់គ្រង (IS, អតីត ISIS / ISIL) ដែលស្ថិតនៅភាគខាងជើងនៃទីក្រុងដឺរអេហ្សហ្ស័រ៕
