មន្ត្រីយោធាកូរ៉េខាងត្បូង បាននិយាយថា ខ្លួនបានអភិវឌ្ឍបច្ចេកវិទ្យាគ្រាប់បែក BLU-114/B របស់អាមេរិក ដែលមានសមត្ថភាពអាចកាត់ផ្ដាច់ចរន្តអគ្គិសនីរបស់កូរ៉េខាងជើង ក្នុងករណីមានសង្គ្រាម។ នេះបើយោងតាមគេហទំព័រសារព័ត៌មាន រុស្ស៊ី (RT) បានចេញផ្សាយនាយប់ថ្ងៃអាទិត្យ ទី០៩ ខែតុលា ឆ្នាំ២០១៧។
មន្ត្រីយោធាកូរ៉េខាងត្បូងម្នាក់ មិនបញ្ចេញឈ្មោះ បានប្រាប់ទីភ្នាក់ងារព័ត៌មាន Yonhap កាលពីម្សិលមិញថា “ក្រសួងការពារជាតិ បានអភិវឌ្ឍបច្ចេកវិទ្យាគ្រាប់បែក BLU-114/B ទាំងអស់សារជាថ្មី ដែលមានសមត្ថភាពអាចកាត់ផ្ដាច់ចរន្តអគ្គិសនីរបស់កូរ៉េខាងជើង ក្នុងករណីមានសង្គ្រាម និងអាចបង្កើតវាបានគ្រប់ពេលវេលា”។
គ្រាប់បែក BLU-114/B បានបង្កើតឡើងដោយសរសៃកាបូនជាប់នឹងខ្សែថាមពល ដែលបង្កឲ្យមានការកាត់ផ្ដាច់ចរន្តអគ្គិសនី និងការរំខានដល់ការផ្គត់ផ្គង់ថាមពល ប៉ុន្តែគ្រាប់បែកនេះ គ្មានប្រសិទ្ធភាពប្រឆាំងនឹងខ្សែកាបអគ្គិសនីដែលមានសារធាតុអ៊ីសូឡង់បាននោះទេ។
គួរបញ្ជាក់ផងដែរថា គ្រាប់បែក BLU-114/B ត្រូវបានបំពាក់ទៅនឹងកាំជ្រួចមីស៊ីល Tomahawk អំឡុងសង្គ្រាមឈូងសមុទ្រឆ្នាំ១៩៩០ ជាមួយប្រទេសអ៊ីរ៉ាក់ ដែលបានកាត់ផ្ដាច់ចរន្តអគ្គិសនី ៨៥ភាគរយនៃការផ្គត់ផ្គង់ថាមពលក្នុងប្រទេស៕
