សហរដ្ឋអាមេរិក ជប៉ុន និងកូរ៉េខាងត្បូង បានចាប់ផ្ដើមសមយុទ្ធរយៈពេល០២ថ្ងៃ ដើម្បីរៀបចំយោធា ឆ្លើយតបចំពោះការគំរាមកំហែងនុយក្លេអ៊ែរ កូរ៉េខាងជើង។ នេះបើយោងតាមគេហទំព័រសារព័ត៌មាន អង់គ្លេស (Express) បានចុះផ្សាយនាព្រឹកថ្ងៃអង្គារ ទី២៤ ខែតុលា ឆ្នាំ២០១៧។
រដ្ឋមន្ត្រីការពារជាតិជប៉ុនលោក Itsunori Onodera បានអំពាវនាវឲ្យមានសកម្មភាពពីសហរដ្ឋអាមេរិក និងកូរ៉េខាងត្បូង នៅពេលមានការព្រមានពីកូរ៉េខាងជើង កាលពីម្សិលមិញ និងការគំរាមកំហែងជាច្រើនលើកច្រើនសារ ដោយបាញ់បង្ហោះមីស៊ីលផ្លោង កាត់លំហអាកាសជប៉ុន។ លោក Onodera លេខាធិការដ្ឋានការពារជាតិអាមេរិកលោក James Mattis និងរដ្ឋមន្ត្រីការពារជាតិកូរ៉េខាងត្បូងលោកSong Young-moo បានបើកកិច្ចប្រជុំរួមគ្នា នៅប្រទេសហ្វីលីពីន ទាក់ទងការការពារប្រទេសក្នុងតំបន់។
គួរបញ្ជាក់ផងដែរថា រដ្ឋមន្ត្រី Onodera បានសន្យាថា នឹងចាត់វិធានការចាំបាច់ថែមទៀត ដើម្បីបង្កើនសមត្ថភាពក្នុងការការពារឲ្យកាន់តែប្រសើរឡើង នូវការចែករំលែកព័ត៌មាន និងពង្រឹងការឆ្លើយតប ចំពោះការគំរាមកំហែងរបស់កូរ៉េខាងជើង៕
