ភ្នំពេញៈ បុរសម្នាក់ បានរងរបួសស្រាល ក្រោយពីជិះម៉ូតូ ត្រូវរថយន្តដឹងអីវ៉ាន់មួយគ្រឿង បើកឆ្លងផ្លូវមិនប្រយ័ត្នជ្រុលបុក ហើយកិនម៉ូតូជាប់ខាងក្រោម ។
ហេតុការណ៍នេះ បង្កការភ្ញាក់ផ្អើលកាលពីវេលាម៉ោង១២និង៣០នាទីថ្ងៃត្រង់ថ្ងៃទី១៧ ខែតុលា២០១៧ នៅមុខផែស្ងួតតិចស្រ៊ុន តាមបណ្តោយផ្លូវជាតិលេខ៤ ស្ថិតក្នុងសង្កាត់ចោចៅ៣ ខណ្ឌពោធិ៍សែនជ័យ រាជធានីភ្នំពេញ។
អ្នកឃើញហេតុការណ៍ បានឲ្យដឹងថា មុនពេលកើតហេតុ គេឃើញបុរសម្នាក់ជិះម៉ូតូម៉ាកវីវ៉ា គ្មានស្លាកលេខ សម្រាប់សណ្តោងរឺម៉ក ធ្វើដំណើរតាមបណ្តោយផ្លូវជាតិលេខ៤ ក្នុងទិសដៅពីលិចទៅកើត ខណៈមកដល់ខាងលើ ស្រាប់តែមានរថយន្តប្រភេទឃ្លប់ដឹងទំនិញ ពណ៌ស ពាក់ស្លាកលេខភ្នំពេញ 3D-9246 ធ្វើដំណើរបញ្ច្រាសទិសគ្នា ហើយបានបត់ឆ្លងផ្លូវបម្រុងចូលផែស្ងួត តិច ស្រ៊ុន ក៏ជ្រុលបុកម៉ូតូពេញទំហឹង និងកិនម៉ូតូជាប់ខាងក្រោមរថយន្ត សំណាងម្ចាស់ម៉ូតូលោតចេញទាន់រងរបួសស្រាល។
ក្រោយពេលកើតហេតុសមត្ថកិច្ចបានចុះទៅដល់ ដោយភាគីទាំងសងខាង ធ្វើការសម្របសម្រួលគ្នា៕
