បន្ទាប់ពី លោក ស៊ន អេលីត ដែលជាបងប្រុស បង្កើតរបស់កញ្ញា ស៊ន សៀវម៉ី បានបង្ហាញអារម្មណ៍ឈឺចាប់ និងការអាក់អន់ចិត្ត នៅពេលប្អូនស្រីរបស់ខ្លួន ជាបុគ្គលមួយរូបធ្លាប់ប្រឹងប្រែង លះបង់គ្រប់បែបយ៉ាង ដើម្បីដណ្តើមមេដៃ និងមុខមាត់ជូនប្រទេសជាតិខ្លួន បែរជាត្រូវគេមិនសូវយកចិត្តទុកដាក់ពេលជួបបញ្ហា និងពេលមានទុក្ខ ដោយ វីរៈកីឡាការិនីកម្ពុជារូបនេះ នឹងត្រូវធ្វើការវះកាត់ជង្គង់ក្នុងពេលឆាប់ៗ ខាងមុខនេះ ក្រោយតស៊ូជាមួយរបួសដ៏រ៉ាំរ៉ៃនេះជាងមួយឆ្នាំ ប៉ុន្តែប្រាក់រង្វាន់សម្រាប់ការដណ្ដើម បានមេដាយមាសស៊ីហ្គេម នាពេលថ្មីៗនេះ មិនទាន់ឃើញបើកឲ្យនៅឡើយទេ ។
ជាមួយនឹងការលើកឡើង របស់បងប្រុសនាង ធ្វើឲ្យព័ត៌មាននេះ កាន់តែកក្រើក រហូតដល់ គណនីហ្វេកបុកអគ្គនាយកដ្ឋានកីឡារបស់ក្រសួងអប់រំ យុវជន និងកីឡា ក៍បានឆ្លើយតបចំពោះករណី យឺតយ៉ាវ ប្រាក់រង្វាន់នេះ ដោយបានលើកឡើងថា ៖
«ដោយសារប្រាក់រង្វាន់ឆ្នាំ២០១៧ មានចំនួនច្រើនលើសពីឥណទានដែលមាន ហើយក្រសួងអប់រំ យុវជន និងកីឡាកំពុងខិតខំប្រមែប្រមូលឥណទានពី ជំពូកផ្សេងៗ ដើម្បីយកបំពេញនូវកង្វះខាតលើឥណទានប្រាក់រង្វាន់នេះ សូមកីឡាករ កីឡាការិនីទាំងអស់យោគយល់ និងអធ្យាស្រ័យក្នុងការយឺតយ៉ាវ» ។
សូមជម្រាបជូនផងដែរថា បើយោងតាមសេចក្តីប្រកាសអន្តរក្រសួង៖
ជ័យលាភីមេដាយមាសទទួលបាន ប្រាក់រង្វាន់៤០លានរៀល
- មេដាយប្រាក់ បាន៣០លានរៀល
- ម្ចាស់មេដាយសំរឹទ្ធ១គ្រឿង ទទួលបាន១៦លានរៀល
- គ្រូបង្វឹកក៏ទទួលបានស្មើនឹងអ្នកឈ្នះមេដាយធំជាងគេ ឯគ្រូជំនួយទទួលបាន ៧០ភាគរយ
