ភ្នំពេញៈ នារសៀលថ្ងៃទី២៥ ខែតុលា ឆ្នាំ២០១៧ ចៅក្រមសាលាដំបូងរាជធានីភ្នំពេញលោក លាង សំណាត់ បានប្រកាសសាលក្រមសម្រេចផ្តន្ទាទោសស្ត្រី ឈ្មោះ រស់ សុភីរ័ត្ន ហៅស្រី រ័ត្ន ជាម្ចាស់ក្រុមហ៊ុន ស្រី រ័ត្ន អន្តរជាតិទេសចរណ៍ ដាក់ពន្ធនាគារ១ឆ្នាំ និងពិន័យ៤លានរៀលចូលថវិការដ្ឋ ក្រោមការចោទប្រកាន់ពីបទរំលោភលើទំនុកចិត្ត តាមមាត្រា៣៩១.៣៩២នៃក្រមព្រហ្មទណ្ឌ។
ជាមួយគ្នានេះតុលាការបានបង្គាប់ឲ្យជនជាប់ចោទសង់សំណងទៅដើមបណ្តឹងរដ្ឋប្បវេណីអតិថិជន៧៤នាក់។
ក្រោយមានសេចក្ដីសម្រេចរបស់តុលាការបែបនេះ បានធ្វើឲ្យជនរងគ្រោះប្រមានជាង៣០នាក់ដែលមកស្ដាប់ការប្រកាសសាលក្រមបានផ្ទុះការតវ៉ានៅក្នុងអគារតុលាការតែម្ដង ដោយអ្នកខ្លះប្រើសម្ដីអសុរសដាក់ចៅក្រមតុលាការ ព្រោះតែក្នុងសេចក្ដីសម្រេចរបស់សាលក្រម ដែលលោកចៅក្រមបានអានមិនបានបញ្ជាក់អំពីចំនួនទឹកប្រាក់ដែលតុលាការបង្គាប់ឲ្យជនជាប់ចោទសងទៅជនរងគ្រោះនោះទេ។
សូមរំលឹកថា នាពេលសវនាការកន្លងមកជនជាប់ចោទបានឆ្លើយថា បុគ្គលិករបស់ខ្លួនឈ្មោះ ង៉ែត ធារី មានតួនាទីជាប្រធានគណនេយ្យ និងលក់សំបុត្រ បានលួចលុយក្រុមហ៊ុនរត់ ហើយលួចលក់សំបុត្រយន្តហោះ ជាង៣០នាក់ ជាសាច់ប្រាក់ ប្រមាណជាង ១០ម៉ឺនដុល្លារ ទើបក្រុមហ៊ុនខ្វះលុយសងទៅអតិថិជន។ កាលពីរសៀលថ្ងៃទី១៥ ខែកុម្ភៈ ឆ្នាំ២០១៧ មន្ត្រីជំនាញ នៃការិយាល័យបង្រ្កាបបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានបញ្ជូនខ្លួនជនសង្ស័យម្នាក់ទៅតុលាការ ពាក់ព័ន្ធករណីឆបោក តាមរយៈការលក់សំបុត្រយន្តហោះក្លែងក្លាយទៅឲ្យអតិថិជនជាច្រើនអ្នក។
បើតាមការឱ្យដឹងពីមន្ត្រីកងរាជអាវុធហត្ថរាជធានីភ្នំពេញ ថា ជនសង្ស័យដែលបានកម្លាំងកងរាជអាវុធហត្ថធ្វើការឃាត់ខ្លួននោះមានឈ្មោះ រស់ សុភីរ័ត្ន ហៅស្រី រ័ត្ន ជាម្ចាស់ក្រុមហ៊ុន ស្រី រ័ត្ន អន្តរជាតិទេសចរណ៍ ដែលមានពីរទីតាំង ទីតាំងទី១ ស្ថិតនៅអគារលេខ៦២-៦៤E០ ផ្លូវមុនីវង្ស សង្កាត់ផ្សារថ្មី២ ខណ្ឌដូនពេញ រាជធានីភ្នំពេញ និងទីតាំងទី២ ស្ថិតនៅផ្ទះលេខ១១៧E0 ផ្លូវកម្ពុជាក្រោម សង្កាត់មិត្តភាព ខណ្ឌ៧មករា រាជធានីភ្នំពេញ។ បានបើកដំណើរការជាយូរឆ្នាំមកហើយ តែនៅក្នុងអំឡុងឆ្នាំ២០១៦-២០១៧ ក្រុមហ៊ុនរបស់ខ្លួនបានជួបបញ្ហាដោយបុគ្គលិកលួចលក់សំបុត្រយន្តហោះក្លែងក្លាយដល់អតិថិជន ហើយសំបុត្រយន្តហោះនោះធ្វើដំណើរមិនបាន អតិថិជនក៏មកទាមទារយកប្រាក់វិញ ក្នុងនោះអតិថិជនខ្លះបានដោះស្រាយរួចហើយ និងខ្លះទៀតមិនទាន់បានដោះស្រាយ ទើបនៅថ្ងៃទី១៣ ខែកុម្ភៈ ឆ្នាំ២០១៧ នៅវេលាម៉ោង៨និង៣០នាទីយប់ រូបខ្លួនក៏ត្រូវបានកម្លាំងកងរាជអាវុធហត្ថឃាត់ខ្លួនតែម្តង៕
