សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានមានប្រសាសន៍ថា ការរំលាយគណបក្សនយោបាយ១ នៅរដ្ឋសភាឆាប់ៗនេះ នឹងកើតមានគណបក្សចំនួន៥ផ្សេងទៀត នៅក្នុងរដ្ឋសភា។ ដែលនេះសបញ្ជាក់ឲ្យឃើញថា កម្ពុជាកាន់តែមានលទ្ធិប្រជាធិបតេយ្យសេរីពហុបក្ស បានល្អប្រសើរ។
ការលើកឡើងរបស់សម្ដេច ហ៊ុន សែន នៅក្នុងពិធីសំណេះសំណាលជាមួយកម្មករកម្មការិនីជាង១ម៉ឺននាក់ នៅរោងចក្រ ISI ផ្លូវវេងស្រេង នាព្រឹកថ្ងៃទី១១ ខែតុលា ឆ្នាំ២០១៧នេះ បានធ្វើឡើងបន្ទាប់ពីតុលាការកំពូល បានបង្គាប់ឲ្យប្រធានគណបក្សសង្គ្រោះជាតិ លោក កឹម សុខា ដាក់ឯកសារត្រៀមឆ្លើយតបនឹងពាក្យសុំរំលាយគណបក្សសង្គ្រោះជាតិ ក្នុងអំឡុងពេល២០ថ្ងៃ គិតចាប់ពីថ្ងៃទី៩ ខែតុលា។ រីឯគណបក្ស សង្គ្រោះជាតិ មិនទាន់សម្រេចយ៉ាងណានៅឡើយទេ ដោយរង់ចាំជជែកជាមួយមេធាវីជាមុនសិន។
ការលើកឡើងខាងលើនេះ ខាងមន្ត្រីជាន់ខ្ពស់ នៃគណបក្សកាន់អំណាច បដិសេធ និងអះអាងថា មិនបានស្នើឲ្យរដ្ឋសភា ធ្វើវិសោធកម្មលើច្បាប់ទាំង៤ ដើម្បីបែងចែកអាសនៈគណបក្សនយោបាយ នៅសភានោះទេ ដោយហេតុថាមិនមែនជាដែនសមត្ថកិច្ច របស់គណបក្សនយោបាយ ប៉ុន្តែនេះជាតួនាទី របស់គណៈកម្មាធិការជាតិរៀបចំការបោះឆ្នោត ៕
