យន្តហោះចម្បាំងកូរ៉េខាងត្បូង ចំនួន០៦គ្រឿង យន្តហោះទម្លាក់គ្រាប់បែកអាមេរិក ចំនួន០២គ្រឿង និងយន្តហោះយោធាជប៉ុន ចំនួន០២គ្រឿង ត្រូវបានបញ្ជូនទៅកាន់អន្តរកូរ៉េ ចំពេលមានការភ័យខ្លាចនៃសង្គ្រាមលោកលើកទី០៣ កើតឡើង។ នេះបើយោងតាមគេហទំព័រសារព័ត៌មាន អង់គ្លេស (Express) បានចេញផ្សាយនាព្រឹកថ្ងៃពុធ ទី១១ ខែតុលា ឆ្នាំ ២០១៧។
យោងតាមអាជ្ញាធរកូរ៉េខាងត្បូង បានឲ្យដឹងថា យន្តហោះទម្លាក់គ្រាប់បែកអាមេរិក B-1B យន្តហោះចម្បាំងកូរ៉េខាងត្បូង F-15K និងយន្តហោះយោធាជប៉ុន មិនស្គាល់ម៉ាក បានហោះឆ្វែលលើតំបន់អន្តរកូរ៉េ ក្នុងន័យចង់បង្ហាញកម្លាំង ទៅដល់ទីក្រុងព្យុងយ៉ាង កាលពីម្សិលមិញ។
គួរបញ្ជាក់ផងដែរថា រដ្ឋមន្ត្រីការពារជាតិអាមេរិក លោក Jim Mattis និងប្រធានអគ្គសេនាធិការចម្រុះ លោក Joseph Dunford បានចូលជួបជជែកពិភាក្សាជាមួយ លោក ដូណាល់ ត្រាំ ជុំវិញជម្រើសនានា ដើម្បីឆ្លើយតប ចំពោះសកម្មភាពបង្កហេតុដោយកូរ៉េខាងជើង ឬដើម្បីទប់ស្កាត់ទីក្រុងព្យុងយ៉ាង មិនឲ្យបង្កការគំរាមកំហែងដល់សហរដ្ឋអាមេរិក និងសម្ព័ន្ធមិត្ត ដោយអាវុធនុយក្លេអ៊ែរ៕
