រាជធានីភ្នំពេញ៖ បន្ទាប់ពីបណ្ដាញព័ត៌មានជាច្រើន រួមទាំង Kqube News ផង បានលើកឡើងជុំវិញរឿងរ៉ាវជីវិត សាន ស្រីឡៃ និងប្ដីរបស់នាង សពលោក ជ័យ រិន, ប៉ុន្តែការលើកឡើងនោះ បានស្រង់ប្រភព និងសម្ភាសន៍តែខាងសាច់ញាតិ សាន ស្រីឡៃ ប៉ុណ្ណោះ ដែលជាប្រការមួយធ្វើឲ្យមហាជន ចង់ដឹងព័ត៌មានខ្លាំងពីប្រភពខាងសាច់ញាតិ សពលោក ជ័យ រិន វិញម្ដង។ ខាងក្រោមនេះ យើងសូមលើកយកមតិមហាជន ដែលនិយាយពីការអាណិតដល់លោកវិញម្ដង។
បើតាមសម្ដីអ្នកស្រុកព្រះស្ដេច ខេត្តព្រៃវែង បានបង្ហើបប្រាប់ពីជីវិតរស់នៅរបស់គ្រួសារមួយ លោក ជ័យ រិន ឬ ខៀវ ម៉ៅ ដែលគេហៅថា គយ ម៉ៅៗ…ហើយគយម៉ៅ ជាកូនកំព្រារឪពុកម្ដាយតាំងពីខ្លួននៅតូចម្ល៉េះ, មានបងប្អូន០៦នាក់, គយម៉ៅ ជាកូនពៅ ក្នុងចំណោមបងប្អូន០៦នាក់ បម្រើការងារជាមន្ត្រីគយចំនួន០៤នាក់។ គយម៉ៅ មានប្រពន្ធដើមឈ្មោះ រដ្ឋា នៅឃុំកំពង់សឹង ស្រុកព្រះស្តេច ខេត្តព្រៃវែង មានកូនចំនួន០៤នាក់ (ស្រី០៣នាក់) ពេញវ័យអស់ហើយ, ហើយសព្វថ្ងៃមានកូនប្រុសម្នាក់មានមុខរបរជាមន្ត្រីយោធា។ គយម៉ៅស្រលាញ់ សាន ស្រីឡៃ ដល់ថ្នាក់ភ្លេចប្រពន្ធដើម ចាប់តាំងពីលោកទៅបម្រើការងារនៅច្រកព្រំដែនគោកប៉ោយប៉ែត ខេត្តបន្ទាយមានជ័យ, បច្ចុប្បន្ន ត្រូវបានថ្នាក់លើផ្លាស់ទៅឲ្យកាន់ការងារនៅខេត្តត្បូងឃ្មុំ។
ក្នុងនោះ គយម៉ៅ ក៏ខិតខំយិតយោងប្រពន្ធទី២ ចាប់ពីដំបូងច្រៀងនៅតាមរង្គសាល និងបានជូនទៅប្រឡងកម្មវិធី The Voice Cambodia រដូវកាលទី២ រហូតបានក្លាយជាតារាប្រចាំផលិតកម្មរស្មីហង្សមាស និងស្ថានីយទូរទស្សន៍ហង្សមាស។ រីឯជីវភាពគ្រួសារ គយម៉ៅ វិញបានថយចុះជាលំដាប់ ពីជិះឡាន ធ្លាក់មកជិះម៉ូតូ…បានប៉ុន្មានថ្ងៃ ក៏កើតរឿងបាញ់សម្លាប់ប្រពន្ធទី២ និងធ្វើអត្តឃាត។ អ្នកជិតខាង និយាយថា ដោយសារគយម៉ៅ គិតថាខ្លួន ណែនាំប្រពន្ធគ្មានប្រសិទ្ធភាព ប្រពន្ធមិនស្ដាប់ ទើបមោហ៍បាំងបែបនេះ៕
