កងជើងទឹកអាម៉េរិក និងកូរ៉េខាងត្បូង បានចាប់ផ្ដើមធ្វើសមយុទ្ធយោធារួមគ្នាចំនួន០៥ថ្ងៃ ចាប់ពីថ្ងៃទី១៧-២៥ ខែតុលា ដើម្បីឆ្លើយតបនឹងការបាញ់សាកល្បងមីស៊ីលផ្លោងកូរ៉េខាងជើង។ នេះបើយោងតាមគេហទំព័រសារព័ត៌មាន Sputnikបានចេញផ្សាយនាព្រឹកថ្ងៃអង្គារ ទី១៧ ខែតុលា ឆ្នាំ២០១៧។
នាវាពិឃាដ សមត្ថភាពមីស៊ីល USS Stetham និង USS Mustin ព្រមទាំងយន្តហោះចម្បាំង USS Ronald Reagan នឹងចូលរួមធ្វើសមយុទ្ធ (MCSOFEX) ជាមួយនាវាកូរ៉េខាងត្បូងជាច្រើនគ្រឿង នៅក្នុងសមុទ្រលឿង និងសមុទ្រជប៉ុន។
ទីភ្នាក់ងារព័ត៌មាន KCNA កូរ៉េខាងជើង បានផ្សាយភ្លាមៗថា “ក្រុម ត្រាំ ទាំងអស់ គួរតែគិតសារឡើងវិញអំពីផលវិបាកដ៏អាក្រក់ ដែលសហរដ្ឋអាមេរិកនឹងប្រឈមមុខ ដោយសារផែនការរបស់ខ្លួន ចំពោះការវាយប្រហារដោយនុយក្លេអ៊ែរ ទៅលើកូរ៉េខាងជើង ដោយបន្ថែមថា ល្បែងយោធានេះ មិនអាចប្រឆាំងនឹងកូរ៉េខាងជើងបានទេ ប៉ុន្តែលទ្ធផលចុងក្រោយដែលអាមេរិក ទទួលបាន គឺការបំផ្លិចបំផ្លាញខ្លួនឯងវិញទេ”។
ទន្ទឹមនឹងនេះ កងទ័ពអាកាសលេខ០៧ ដែលមានយន្តហោះចម្បាំងធុន F-22 Raptors យន្តហោះទម្លាក់គ្រាប់បែក B-1B Lancer និងយោធាដទៃទៀត ចំនួន២០០នាក់ បានត្រៀមរៀបចំធ្វើសមយុទ្ធរួមគ្នា នៅទីក្រុងសេអ៊ូលផងដែរ៕
