រដ្ឋមន្ត្រីក្រសួងការបរទេសអូស្ត្រាលី បានប្រាប់ឲ្យដឹងថា កូរ៉េខាងជើង បានផ្ញើលិខិតមួយច្បាប់ ទៅសភាអូស្ត្រាលី ដោយព្រមានខ្លាំងៗថា អាវុធនុយក្លេអ៊ែរទីក្រុងព្យុងយ៉ាង នៅតែបន្តគំរាមកំហែងទីក្រុងស៊ីដនី និងបណ្ដាប្រទេសនានា ដោយសារតែ ប្រធានាធិបតីអាមេរិកលោក ដូណាល់ ត្រាំ ជាមិនខាន។ នេះបើយោងតាមគេហទំព័រសារព័ត៌មាន Reuters បានចេញផ្សាយនាព្រឹកថ្ងៃសុក្រ ទី២០ ខែតុលា ឆ្នាំ២០១៧។
រដ្ឋមន្ត្រីក្រសួងការបរទេសអូស្ត្រាលីលោកស្រី Julie Bishop បាននិយាយថា លិខិតមួយច្បាប់ ដែលត្រូវបានបញ្ជូនពីស្ថានទូតកូរ៉េខាងជើង នៅទីក្រុងហ្សាកាតា ប្រទេសឥណ្ឌូណេស៊ី ទៅកាន់ស្ថានទូតអូស្ត្រាលី និងប្រទេសដទៃទៀត ដោយមិនដាក់ឈ្មោះ។ លិខិតនេះអំពាវនាវឲ្យ បណ្ដាប្រទេសដែលស្រឡាញ់ឯករាជ្យភាព សន្តិភាព និងយុត្តិធម៌ ដើម្បីបំពេញកាតព្វកិច្ចរបស់ខ្លួន និងរក្សាការប្រុងប្រយ័ត្ន យ៉ាងខ្លាំងប្រឆាំងនឹងការផ្លាស់ប្ដូរដ៏សាហាវរបស់រដ្ឋបាល ត្រាំ ដែលកំពុងព្យាយាមធ្វើឲ្យពិភពលោក ធ្លាក់ចូលមហន្តរាយ ដោយសង្គ្រាមនុយក្លេអ៊ែរដ៏អាក្រក់នេះ។
គួរបញ្ជាក់ផងដែរថា ប្រធានាធិបតីអាមេរិក លោក ដូណាល់ ត្រាំ ថ្លែងសុន្ទរកថា កាលពីខែមុន នៅឯអង្គការសហប្រជាជាតិថា យើងនឹងបំផ្លាញកូរ៉េខាងជើង ទាំងស្រុង ដើម្បីការពារខ្លួន និងសម្ព័ន្ធមិត្ត ហើយហៅមេដឹកនាំផ្ដាច់ការកូរ៉េខាងជើង គីម ជុងអ៊ុន គឺជាតឃាតករ ឈាមត្រជាក់៕
