អគ្គរដ្ឋទូតរងកូរ៉េខាងជើងប្រចាំ UN លោក Kim In Ryong បានប្រាប់ឲ្យដឹងថា កូរ៉េខាងជើង គាំទ្រទាំងស្រុង ចំពោះគំនិតលុបបំបាត់អាវុធនុយក្លេអ៊ែរ នៅលើពិភពលោក ដរាបណាសហរដ្ឋអាមេរិក យល់ព្រមបោះចោលអាវុធនុយក្លេអ៊ែររបស់ខ្លួនមុនសិន។ នេះបើយោងតាមគេហទំព័រសារព័ត៌មាន Sputnik បានចេញផ្សាយនារសៀលថ្ងៃអង្គារ ទី១៧ ខែតុលា ឆ្នាំ២០១៧។
លោក Kim In Ryong បានថ្លែងទៅកាន់គណៈកម្មាធិការ នៃមហាសន្និបាត UN ថា “កូរ៉េខាងជើងគាំទ្រទាំងស្រុងចំពោះគំនិត និងកិច្ចខិតខំប្រឹងប្រែងលុបបំបាត់អាវុធនុយក្លេអ៊ែរ នៅលើពិភពលោកទាំងមូល ប៉ុន្តែដរាបណា សហរដ្ឋអាមេរិកនៅតែគំរាមកំហែង និងមានចេតនាអាក្រក់លើកូរ៉េខាងជើង ដោយប្រើប្រាស់អាវុធនុយក្លេអ៊ែរ ឬក៏ទាត់ចោលសន្ធិសញ្ញា NBT (សន្ធិសញ្ញាហាមឃាត់អាវុធនុយក្លេអ៊ែរ) នោះទីក្រុងព្យុងយ៉ាង មិនអាចទទួលយក ឬគោរពតាមសន្ធិសញ្ញានេះឡើយ”។
គួរបញ្ជាក់ផងដែរថា កងទ័ពជើងទឹកអាម៉េរិក និងកូរ៉េខាងត្បូង បានចាប់ផ្ដើមធ្វើសមយុទ្ធយោធារួមគ្នា (MCSOFEX) ចំនួន០៥ថ្ងៃ ចាប់ពីថ្ងៃទី១៧-២៥ ខែតុលា ដែលមាននាវាពិឃាដ សមត្ថភាពមីស៊ីល USS Stetham និង USS Mustin ព្រមទាំងនាវាដឹកយន្តហោះ USS Ronald Reagan នៅក្នុងសមុទ្រលឿង និងសមុទ្រជប៉ុន ដើម្បីឆ្លើយតបនឹងការបាញ់សាកល្បងមីស៊ីលផ្លោងកូរ៉េខាងជើង៕
