ភ្នំពេញៈ ជនជាតិចិន ប្រមាណជាង៧០នាក់ ត្រូវបាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ដឹកនាំកម្លាំងដោយឧត្តមសេនីយ៍ឯក ឃុន សំបូរ អគ្គនាយករងអន្តោប្រវេសន៍ តំណាងដ៏ខ្ពងខ្ពស់នាយឧត្តមសេនីយ៍ អគ្គនាយកអន្តោប្រវេសន៍ និងក្រសួងមហាផ្ទៃ បណ្តេញចេញពីកម្ពុជា នាព្រឹកថ្ងៃទី១២ ខែតុលា ឆ្នាំ២០១៧ វេលាម៉ោង១១និង៣០នាទីព្រឹកនេះ។
ប្រធាននាយកដ្ឋានស៊ើបអង្កេត និងអនុវត្តនីតិវិធី លោកឧត្តមសេនីយ៍ឯក អ៊ុក ហៃសីឡា បានឲ្យដឹងថា ជនជាតិចិន ដែលធ្វើការបណ្តេញចំនួន៧៤នាក់ ស្រី១៤នាក់ ពាក់ព័ន្ធករណីជំរិតទារប្រាក់តាមប្រព័ន្ធអ៊ីនធឺណេត (VOIP) ទៅកាន់ខេត្ត Shan Dong, ខេត្តJiang Su និងខេត្តHe Nan ប្រទេសចិន តាមជើងយន្តហោះCZ8683/CZ8684 ដោយមានក្រុមប៉ូលិសចិនមកទទួលនៅព្រលានយន្តហោះអន្តរជាតិភ្នំពេញ។
សូមបញ្ជាក់ថា ជនជាតិចិនទាំងអស់ខាងលើ ត្រូវបានឃាត់ខ្លួនដោយអគ្គនាយកដ្ឋានអន្តោប្រវេសន៍ សហការជាមួយអគ្គស្នងការដ្ឋាននគរបាលជាតិ នៅគោលដៅរាជធានីភ្នំពេញ និងខេត្តព្រះសីហនុ កាលពីថ្ងៃទី៥ ខែតុលា ឆ្នាំ២០១៧ ដោយមានការចង្អុលបង្ហាញពីឧត្តមសេនីយ៍ឯក ឃុន សំបូរ អគ្គនាយករងអន្តោប្រវេសន៍៕
