កូរ៉េខាងជើង គ្រោងបាញ់គ្រាប់នុយក្លេអ៊ែរដ៏គួរឲ្យភ័យខ្លាចបំផុត នៅថ្ងៃនេះ ខណៈពេលដែលប្រធានាធិបតីអាមេរិកលោក Donald Trump ជួបប្រជុំជាមួយសមភាគីកូរ៉េខាងត្បូង។ នេះបើយោងតាមគេហទំព័រសារព័ត៌មាន អង់គ្លេស (Express) បានចុះផ្សាយនាព្រឹកថ្ងៃពុធ ទី០៨ ខែវិច្ឆិកា ឆ្នាំ២០១៧។
អ្នកឯកទេសកូរ៉េខាងជើងម្នាក់ បាននិយាយថា ទីក្រុងព្យុងយ៉ាង ជារឿយៗរៀបចំការសាកល្បងមីស៊ីលរបស់ខ្លួន ស្របពេលជាមួយកិច្ចប្រជុំអន្តរជាតិធំៗជាច្រើន ព្រមទាំងដំណើរទស្សនកិច្ចរបស់លោក Donald Trump នាពេលថ្មីនេះ ទៅកាន់ទីក្រុងសេអ៊ូល អាចជាឱកាសដ៏ល្អឥតខ្ចោះសម្រាប់លោក គីម ជុងអ៊ុន។
គួរបញ្ជាក់ផងដែរថា មេដឹកនាំផ្ដាច់ការកូរ៉េខាងជើង លោក គីម ជុងអ៊ុន អាចអភិវឌ្ឍន៍មីស៊ីលផ្លោងបានល្អជាងនេះទៅទៀត ដោយលោកបានសន្យា កាលពីដើមរដូវក្ដៅនេះ ដើម្បីចាប់ផ្ដើមការបំផ្ទុះដ៏ខ្លាំងក្លាបំផុតនៃគ្រាប់មីស៊ីលសេរីថ្មីមួយទៀតឈ្មោះថា H-Juche Bird នៅសមុទ្រប៉ាស៊ីហ្វិក។
