លិខិតមិត្តអ្នកអាន៖ ជីវិតអ្នកម្តាយ មិនដែលត្អូញត្អែរឡើយរឿង ការខិតខំចិញ្ចឹមបីបាច់ថែរក្សាកូនឲ្យមានជីវិតរស់ធំធាត់ រហូតមានគ្រួសារ តែមិនគួរណាឲ្យលោករស់នៅម្នាក់ឯងឯកាទាំងវ័យចាស់ជរា ដើរធ្វើការស៊ីឈ្នួលគេច្រូតស្រូវ ដកស្មៅក្នុងចំការក្បែរទល់ដែលថៃ ដើម្បីបានលុយបន្តិចបន្តួចយកមកពីទិញអង្ករនិងអំបិលប្រហុកមកបរិភោគ។
នេះគឺខ្សែជីវិតរបស់ដូនចាស់ម្នាក់ មានកូនបួននាក់ តែដល់ពេលចាស់ឡើងគ្មានអ្នកថែរក្សា ទុកឲ្យរស់នៅតែលតោលតែម្នាក់ឯង ដែល មិត្តអ្នកអានម្នាក់ ផ្ញើមក KQUBE ស្នើឲ្យជួយចុះផ្សាយ ដើម្បីឲ្យដល់អ្នកមានចិត្តសប្បុរស សណ្តោសប្រណីជួយដល់លោកយាយ អៀង ញ៉ អាយុ ៧៣ឆ្នាំ ដែលបាននិយាយទាំងអួលដើមកថា «មានកូនដូចអត់កូន»។
ព្រោះដូនចាស់ម្នាក់នេះរស់នៅទាំងត្រដាបត្រដួស ស៊ីឈ្នួលគេកណ្តាលថ្ងៃក្តៅ រកលុយចិញ្ចឹមខ្លួន ទិញអង្ករដាំបាយពិសារម្នាក់ឯង នៅខ្ទមក្បែរជើងភ្នំ ក្នុងភូមិ វាលរហាត់ ឃុំ មាល័យ ស្រុក មាល័យ ខេត្ត បន្ទាយមានជ័យ។
ដើម្បីជ្រាបច្បាស់ថា លោកយាយមានទុក្ខធំ លំបាកតោកយាកប៉ុណ្ណានោះ សូមទស្សនាវីដេអូខាងក្រោមនេះ៖
