ប្រធានាធិបតីអាមេរិក បានមកដល់ប្រទេសវៀតណាម នាព្រឹកនេះ ដើម្បីចូលរួមកិច្ចប្រជុំមេដឹកនាំអាស៊ី-ប៉ាស៊ីហ្វិក (APEC) ដែលជាថ្ងៃទី០៤ នៃដំណើរទស្សនកិច្ចនៅអាស៊ីរយៈពេល ១២ថ្ងៃ។ នេះបើយោងតាមគេហទំព័រសារព័ត៌មាន Channelnewsasia បានចេញផ្សាយនារសៀលថ្ងៃសុក្រ ទី១០ ខែវិច្ឆិកា ឆ្នាំ២០១៧។
សេតវិមាន បាននិយាយថា លោក ដូណាល់ ត្រាំ នឹងបង្ហាញចក្ខុវិស័យរបស់សហរដ្ឋអាមេរិក ចំពោះសេរីភាពក្នុងការបើកចំហក្នុងតំបន់ឥណ្ឌូចិន នៅក្នុងសុន្ទរកថាមួយ នារមណីយដ្ឋានឆ្នេរសមុទ្រ ទីក្រុង ដាណាំង (Danang) ប្រទេសវៀតណាម។
គួរបញ្ជាក់ផងដែរថា លោក ដូណាល់ ត្រាំ បានសរសើរយ៉ាងខ្លាំងដល់មេដឹកនាំកំពូលចិនលោក ស៊ី ជីនភីង និងប្រកាសថា ដំណើរទស្សនកិច្ចនេះ បានជួយដោះស្រាយបញ្ហាជាច្រើន ព្រមទាំងរិតបន្តឹងចំណងទំនាក់ទំនងអាមេរិក និងចិន កាន់តែខ្លាំងឡើង៕
