រតនគិរីៈ សមត្ថកិច្ចចម្រុះ ដែលមានតួនាទីប្រចាំការនៅច្រកទ្វារអន្តរជាតិអូរយ៉ាដាវ កំពុងបើកកុងត្រូលឲ្យរថយន្តដឹកឈើប្រណីតខុសច្បាប់ចូលទៅប្រទេសវៀតណាមមុនម៉ោង៧ព្រឹកដែលល្មើសនឹងច្បាប់ ជាក់ស្តែងកាលពីវេលាម៉ោង៦និង២២ព្រឹកថ្ងៃទី៧ ខែវិច្ឆិកា ឆ្នាំ២០១៧កន្លងទៅ គេសង្កេតឃើញសមត្ថកិច្ចបានបើកច្រកទ្វារឲ្យរថយន្តដឹកឈើខុសច្បាប់ទាំងនោះចូលទៅប្រទេសវៀតណាមយ៉ាងគគើ្លន ដោយមិនកោតក្រែងនឹងច្បាប់ទម្លាប់ឡើយ ប្រហែលជាមន្ត្រីប្រចាំការអស់ទាំងនោះរកផលប្រយោជន៍ឲ្យមេៗហើយ បានជាមេៗមិនមានចំណាត់ការអ្វីទាល់តែសោះចំពោះមន្ត្រីខិលខូចអស់ទាំងនោះ?
គេសង្កេតឃើញយ៉ាងហោចណាស់មានមន្ត្រី៤ស្ថាប័ន ក្នុងនោះរួមមាន៖ គណកម្មការច្រកទ្វារ គយ និងរដ្ឋាករ កាំងកុងត្រូល និងនគរបាលអន្តោប្រវេសន៍ នៅចាំរាប់ក្បាលឡានដឹកឈើខុសច្បាប់ទៅប្រទេសវៀតណាម ដើម្បីបង់លុយតែប៉ុណ្ណោះ ហើយក្នុង១ថ្ងៃៗ គេសង្កេតឃើញរថយន្តដឹកឈើប្រណីតខុសច្បាប់ទៅប្រទេសវៀតណាមឆ្លងកាត់ផ្លូវជាតិលេខ៧៨ត្រង់ច្រកទ្វារអន្តរជាតិអូរយ៉ាដាវមិនតិចជាង៨០ទៅ១០០គ្រឿងក្នុង១ថ្ងៃ។
ប្រភពដាច់ដោយឡែកមួយទៀតពីឈ្មួញរកស៊ីដឹកឈើខុសច្បាប់សុំមិនបញ្ចេញឈ្មោះ មិនសប្បាយចិត្ត និងសមត្ថកិច្ចនៅតាមដងផ្លូវជំរិតទារប្រាក់ គាត់បានឲ្យដឹងថា ក្នុងរថយន្តបាឡែនមួយគ្រឿងចេញពីស្រុកបរកែវ គាត់ត្រូវបង់លុយឲ្យសមត្ថកិច្ចក្នុង១ជើងពី៤លានរៀលទៅ៥លានរៀល និងរថយន្តសាំយ៉ុងចាប់ពី៨លានរៀលទៅ៩លានរៀល ទើបទៅដល់ប្រទេសវៀតណាម ហើយពួកសមត្ថកិច្ចដែលប្រចាំការនៅច្រកទ្វារអន្តរជាតិអូរយ៉ាដាវនោះ សប្បាយចិត្តនិងញញឹមញញេមរត់ទៅបើកកុងត្រូលឲ្យរថយន្តដឹកឈើប្រណីតខុសច្បាប់ទាំងនោះចូលទៅឲ្យផុតៗទៅកុំឲ្យភ្ញៀវទេសចរគេឃើញ។
ចំណែកឯរថយន្តដឹកកសិផលរបស់កសិករវិញ សមត្ថកិច្ចអស់ទាំងនោះហាក់បីដូចជាខ្វល់ខ្វាយណាស់ប្រើកម្មកររើស្រាយតង់ប្រើសំរ៉បចាក់លើបាវសណ្តែងធ្លុះរយះរយាយហាក់ដូចជា រថយន្តដឹកកសិផលនោះបង្កប់ឈើប្រណីតអ៊ីចឹង ហាក់ដូចជាបង្អួតមហាជន និងថ្នាក់លើរបស់ខ្លួនផងដែរ ចំណែកឯរថយន្តដឹកឈើសឹងតែបាក់ឡាន ហាក់ដូចជាមើលមិនឃើញសោះ រត់ទៅបើកច្រកទ្វារឲ្យយ៉ាងប្រយ៉ាប់ប្រយ៉ាល។
ជុំវិញការចោទប្រកាន់ខាងលើនេះ លោក អាន អង្គារ៉ា ប្រធានស្នាក់ការគយ និងរដ្ឋាករ លោក អ៊ី ចំរើន នាយប៉ុស្តិ៍នគរបាលអន្តោប្រវេសន៍ មិនអាចសុំការបំភ្លឺបានទេ កាលពីថ្ងៃទី៧ ខែវិច្ឆិកា ឆ្នាំ២០១៧ ដោយទូរស័ព្ទចុចចូលមិនមានអ្នកទទួល៕
