ព្រះសីហនុៈ នារីជនជាតិវៀតណាមម្នាក់ ត្រូវបានកម្លាំងមន្ទីរយុត្តិធម៌នៃកងរាជអាវុធហត្ថខេត្តព្រះសីហនុ ដឹកនាំដោយលោកវរសេនីយ៍ទោ ឆេង វុទ្ធី ប្រធានមន្ទីរយុត្តិធម៌ បានសហការជាមួយកម្លាំងកងរាជអាវុធហត្ថ ខេត្តស្វាយរៀង ដឹកនាំដោយលោកវរសេនីយ៍ឯក ស្រី វុត្ថា មេបញ្ជាការរង កងរាជអាវុធហត្ថ ខេត្តស្វាយរៀង ឃាត់ខ្លួន កាលពីវេលាម៉ោង៧យប់ថ្ងៃទី២៣ ខែវិច្ឆិកា ឆ្នាំ២០១៧ នៅចំណុចក្រុម15 ភូមិ04 សង្កាត់លេខ04 ក្រុង/ខេត្តព្រះសីហនុ។
មន្រ្តីប៉េអឹម បានឲ្យដឹងថា ជនសង្ស័យឈ្មោះ ង្វៀន ធីគៀវវ៉ាន់ ភេទស្រី អាយុ៣០ឆ្នាំ ជនជាតិរៀតណាម មានទីលំនៅភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង។
មន្រ្តីប៉េអឹម បន្តថា ការឃាត់ខ្លួននារីខាងលើនេះ គឺអនុវត្តន៍ដីកាបញ្ជាឲ្យចូលខ្លួន លេខ91 ចុះថ្ងៃទី២១ ខែវិច្ឆិកា ឆ្នាំ២០១៧ របស់លោក គង់ ច័ន្ទខេមរិទ្ធ ព្រះរាជអាជ្ញាអមសាលាដំបូងខេត្តស្វាយរៀង ពាក់ព័ន្ធនឹងបទល្មើសសារធាតុញៀន។
ក្រោយពីឃាត់ខ្លួន កម្លាំងប៉េអឹមបានធ្វើការដកហូតវត្ថុតាងរួមមាន៖ -ប្រាក់ដុល្លារ 7450 ដុល្លារ -ទូរស័ព្ទអាយហ្វូន២គ្រឿង -លិខិតឆ្លងដែនវៀតណាមចំនួន២ក្បាល។
បច្ចុប្បន្នជនសង្ស័យនិងវត្ថុតាង កម្លាំងកងរាជអាវុធហត្ថខេត្តព្រះសីហនុ កំពុងរៀបចំឯកសារ ដើម្បីបញ្ជូនទៅខេត្តស្វាយចាត់ការបន្ត៕
