ភ្នំពេញៈ រដ្ឋាភិបាលវៀតណាម បានប្រកាសពីជំហរបន្ដកិច្ចសហប្រតិបត្ដិការជាមួយកម្ពុជាលើគ្រប់វិស័យ ដើម្បីបម្រើផលប្រយោជន៍ដល់សង្គមជាតិ និងប្រជាពលរដ្ឋ។
ការប្រកាសជំហរនេះ ធើ្វឡើងក្នុងជំនួបជាមួយសម្ដេចក្រឡាហោម ស ខេង ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ និងឧត្ដមសេនីយ៍ទោ ហ័ង សួនចៀន មេបញ្ជាការកងទ័ពការពារព្រំដែន នៃប្រទេសវៀតណាម កាលពីល្ងាចថ្ងៃទី២៧ ខែវិច្ឆិកា នៅទីស្ដីការក្រសួងមហាផ្ទៃ។
ក្នុងឱកាសនោះដែរ ឧត្ដមសេនីយ៍ទោ ហ័ង សួនចៀន បានលើកឡើងថា ភាគីវៀតណាម នៅតែបន្ដកិច្ចសហប្រតិបត្ដិការយ៉ាងរឹងមាំ និងល្អប្រសើរ រវាងកងទ័ព នគរបាលការពារព្រំដែន និងស្ថាប័នរបស់ប្រទេសកម្ពុជាគ្រប់លំដាក់ថ្នាក់ ដើម្បីជួយសម្របសម្រួលក្នុងការឆ្លងកាត់ធ្វើពាណិជ្ជកម្ម ទេសចរណ៍ ឲ្យទទួលវឌ្ឍនភាពសេដ្ឋកិច្ចរវាងប្រទេសទាំង២។
ជាការឆ្លើយតប សម្ដេចក្រឡាហោមបានស្វាគមន៍ និងគាំទ្រ ក្នុងការធ្វើទស្សនកិច្ចនៅកម្ពុជានាពេលនេះ ដោយលទ្ធផលកន្លងមក ការងារដែលកងកម្លាំង កងទ័ពរបស់វៀតណាមបានមកពិភាក្សាជាមួយក្រសួងការពារជាជាតិ និងអគ្គនាយកដ្ឋានអន្ដោប្រវេសន៍របស់ប្រទេសកម្ពុជា គឺទទួលបានលទ្ធផលល្អប្រសើរ។
សម្ដេចសង្ឃឹមថា លើកនេះ កងកម្លាំងនគរបាលកម្ពុជា-វៀតណាម នឹងបន្ដពិភាក្សាជាមួយគ្នា លើបញ្ហាការងាផ្សេងៗឲ្យកាន់តែទទួលបានប្រសិទ្ធិភាពបន្ថែមទៀត។
សម្ដេចបានបញ្ជាក់ថា រាជរដ្ឋាភិបាលកម្ពុជា ក៏បាននឹងបន្ដកិច្ចសហប្រតិបតិ្ដការយ៉ាងជិតស្និទ្ធ ជាមួយភាគីវៀតណាមនៅគ្រប់កម្រិត តាមគោលនយោបាយរបស់ថ្នាក់ដឹកនាំទាំង២ ដើម្បីបន្ដសុខសន្ដិភាព និងការអភិវឌ្ឍសម្រាប់បម្រើផលប្រយោជន៍របស់ប្រជាពលរដ្ឋរវាងប្រទេសទាំង២៕
