ភ្នំពេញៈ តារាស្រីដែលធ្លាប់តែសប្បាយរីករាយជាមួយពាក្យតារាលេចធ្លោមានការគាំទ្រ កញ្ញា អេនីហ្សាម ត្រូវខកខានចេញមុខច្រៀងលើកញ្ចក់ទូរទស្សន៍ជិត២ឆ្នាំ។ ចំណុចទាំងនេះ បានធ្វើឲ្យកញ្ញាធ្លាប់ល្បីឈ្មោះ រួមមានការខូចចិត្តពន់ពេក គ្រាបង្ហាញវត្តមានថ្មីៗ នាងទម្លាយរឿងជាច្រើនគួរឲ្យភ្ញាក់ផ្អើល។
តារាតូចតន់តែប្រែមុខមាត់ទៅជាធាត់ទ្រលុតទ្រលន់ អេនីហ្សាម បានបង្ហាញវត្តមានថ្ងៃសម្ពោធរឿង "អ្នកបម្រើ០០៧" កាលពីម្សិលមិញ ធ្វើឲ្យមហាជនអ្នកសិល្បៈចាប់អារម្មណ៍ និងភ្ញាក់គ្រប់គ្នា ខណៈនាងមានរូបរាងធាត់ម៉ាប់ប្លែកឆ្ងាយ មិនស្វេលដូចមុន។
អេនីហ្សាម បានបញ្ជាក់ប្រាប់ពីបញ្ហាជាច្រើនជុំវិញរូបរាង និងសិល្បៈឲ្យ CAM POST ដឹងថា នាងពិតជាឆ្ងល់ ហើយមិនធ្លាប់គិតថា នាងស្ទើរតែបាត់ទីផ្សារជាមួយសិល្បៈ ស្ទើរតែដាច់ផឹងបែបនេះឡើយ។ នាងយល់ថា មកពីចម្រៀងរបស់នាងមិនសូវចេះលេងស្ទីលប្លែកៗ បានជាដាំក្បាលចុះ ដូចជាការបង្ហាញក្បាច់រាំជាដើម។ នាងបន្តថា កាន់តែហួសចិត្តស្ថាប័នណា ក៍មិនហៅ ក្រុមហ៊ុនណា ក៏មិនរកគេច្រៀងតាមខេត្តក្រុងគ្រប់គ្នា តែនាងស្ងាត់សូន្យគួរឲ្យខ្មាស។ម្ល៉ោះហើយ ទើបចេះតែញាំនេះញាំនោះមិនគិតរក្សារាង ហើយឡើងធាត់មើលមិនចង់ស្គាល់ ព្រោះអីឡើងជិត១០គីឡូ។
អេនីហ្សាម បន្តបង្ហាញរឿងទៀតថា ខ្ញុំនឹងបងប្រុសមង្គល ទីណា សុទ្ធតែជាបង្គោលគ្រួសាររកលុយទប់ជីវភាពគ្រួសារ លុះបងក៏ស្ងាត់ ប្អូនក៏ស្ងាត់ មានតែការបាក់ទឹកចិត្តរហូតនាងទប់ចិត្តមិនបាន។
នៅពេលនេះ អេនីហ្សាម ត្រូវបានផលិតកម្មថោនសម្រេចចេញបទចម្រៀងជាច្រើនឲ្យថតសម្តែងត្រៀមស្វាគមន៍ឆ្នាំ២០១៨។ កន្លងមក អេនីហ្សាម មានបទផ្ទាល់ខ្លួនចេញផ្សាយដែរ ដោយនាងមិនសម្តែងទេ ធាត់ពេក។ មានភ្លើងខៀវឡើងវិញ អេនីហ្សាម បានតាំងចិត្តខំសម្រករាង ហើយរកអ្វីដែលថ្មីប្លែកទប់ កុំឲ្យបាត់ប្រជាប្រិយភាពដូចមុន៕
